Eungn Ayas, la sélébrachón di mariadzo, rituel llétó i sicle de la via, l’è caratérizéye pe de coteumme que arreuvon d’eungn’estrà viille tradechón : salla di barryie é salla di fouà.
Seutte coteumme eun le retroue étò eun d’atre quemeun-e de la réjón. Salla di barryie l’è repandua avouì catche variante, menque la seconda, le fouà eungn’occajón di fite de nose, l’ie bièn prézanta eun cou mi l’è pi rer de la vire voueu lo dzor. Fran pe diye, le fouà pe le-z-épeui apparteugnon i coteumme de la comba de l’Évansón.
Totte dave l’an seurvequì canc’ara, seurtoù deun la parotse d’Ayas, grase a la trasmechón de jénérachón eun jénérachón. L’è pe sen que l’è mangagnèn de troué leur orijinne. Pouèn can mimo itre co preui cheur que la pi gran par de seutte tradechón son é sayàn gropéye i sérémonie relijeuze : la dévochón crétchenna-catoleucca l’ie lo fondemèn de la communoté de montagne, comme salla di-z-Ayasseun.
Fo deusteungué le dou rituel pe nen comprende amoddo lo sanse. Eun le fé tcheu dou can di mouente eun di-z-épeui l’è de Ayas, mi le barryie eun le fé maque pe l’épeuiza.
Eun fé le barryie lo dzor mimo di mariadzo, lo mateun, djeusto bièn devàn que allé a l’éillize, a l’entor di mitcho de l’épeuiza. Vitto lo mateun, le paèn, le-z-amì é le dzi di veladzo de la feuille apreston de trabetset lo lon di tsemeun que pourte i mitcho. Prègnon de bouque, de lan, de tron lon é preun, de moublo é co d’atre ravèiduye. To sen pe eumpatché lo passadzo a l’épeuiza, pe po la léché partì ià. Devàn que la sérémonie, totse a l’épeui é a se-z-amì touté seutte barryie pe poussèi allé tsertché l’épeuiza é allé a l’éillize eunsemblo.
Lo segnefià seumboleucco di rituel di barryie l’è bièn eumpourtàn é moutre, voueu lo dzor comme ier, la forta coéjón de la sosiétó de montagne.
Le fouà son la coteumma preunsipala de réjouissanse pe accompagné le-z-épeui ver leur mitcho de marió. Ara eun rèye sisse fouà la nite di dzor di mariadzo ou beun can le-z-épeui tornon di voyadzo de nose. Djaque, seuncant’an fé eun féjè po la leunna de mique é donque eungn allemae sisse fouà la nite di dzor di mariadzo. La fita pe le-z-épeui l’et aprestéye pe le fameuille de tcheu dou, pe le-z-amì é pe le dzi di veladzo ieui allerén pi ité.
Deun lo mariadzo de Katia é Patrick, eungn a fé le dou rite a Pallenc d’Ayas ieui lèi son le mitcho de l’épeuiza é co sisse ieui allerén vivre eunsemblo. Pe fiye le fouà, eungn apreste de mouì de paille lo lon di tsemeun que pourte i mitcho épeui. Eun de lo tar, can tornon di voyadzo de nose, eun baille maamàn fouà a la paille. Ommo é fenna l’an fallù pasé euntre le fouà réyà é lo feun. Eun pi di fouà, la tradechón l’ou qu’eun saluèye lo retor di-z-épeui atò de dzente décorachón : de balle brantse de pesse atò de fleur de papì blantse, pése é rodze garnèison le mitcho. Totte seutte fleur, de pégne euvre d’ar, son itéye fabrequéye dza de mèis devàn pe le fenne di veladzo. Pe levré la souaré, de riilla, eungn apreste eun reussegnón pe tcheut.
Le-z-épeui san po ren de sen que accapiteré, mi son bièn contèn é aprésion seutte tradechón que démoutron l’afféchón é le soué de totta la communitó.
