Tsertsa

Dichonéo

Contenù di site

Multimédià

Teste eun patoué

Documàn

L'Écoulla populéra de patoué

CRÈITRE DEUN LA TRADECHÓN

(patoué di-z-Amaveulle)

L'Écoulla populéra de patoué l'è eun di moyèn que l'Assessorà de l'éducachón é de la queulteua de la Réjón otonomma Val d'Ousta eumpléye pe pouché, pe fiye cougnitre mioù lo patoué é baillé a la lenva de noutra tradechón, eumpourtàn patrimouéno eunmatériel, la possibilitó de s'épandì.

Tot eun lo vardèn é eun lo fiyèn crèite, lo patoué veunt euncó eungn élémàn d'euntégrachón é eungn'opportunitó pe le dzi que veugnon de ià, pe le valdotèn que son po nèissù inque, d'assimilé le tré lengueusteucco de noutra réjón é de se recougnitre deun se valeur queulterelle é idantitére.

Nèissù deun lo 1995 atò l'euntenchón de fiye cougnitre mioù lo patoué a tcheut eun propouzèn de cours pe prédjé, pe écrie é pe mezaté pi a fon su la lenva, lo projé l'è viìn mamàn pi reutso avouì de-z-attivitó pi euncoadzante é euntéressante comme le cours de téatro pe le petchoù é pe le grou, le cours spesefeucco de cougnisanse é d'aprofondissemèn de noutra sivilizachón é de noutro patrimouéno idantitéro, le "ben de lenva", momàn d'imerchón lengueusteucca eun patoué.

Le cours de l' Écoulla populéra de patoué s'adrèchon a tot a sor de pebleuque é, pe beutté eun valeur totte le défente variante, son organizó su to lo téritouéo valdotèn selón lo nombro di-z-eunscrì. Nen n'a de défèn nivó, pe sisse que eungnouon, pe sisse que l'an voya de améilleré é de allé pi a fon deun la cougnisanse de la lenva, todzor avouì eun dobblo beut: sit de moutré lo patoué a sisse que lo san panco é sit de permettre a sisse que lo prèdzon dza de lo cougnitre depì, de comprende le-z-atre patoué ou beun d'aprende a lo écrie.

Lo projé propouze défente-z-attivitó pe aprende ou aprofondì l'éteudzo di francoprovansal deun se variante, pe cougnitre la spesefesitó lengueusteucca de noutra réjón, pe déquevrì lo téritouéo valdotèn é se tradechón queulterelle, pe aprende comme eun pou écrie lo patoué atò eun code perféchon-ó é adotó pe l'Assessorà de l'éducachón é de la queulteua de la Réjón otonomma Val d'Ousta.

Bén de lénva

Staje de patoué

Avétsa l'imadze

(patoué de Gressàn)

Deun l'offre de l'Icoula populéra de Patoué son itoù propozoù dèi l'an 2009 de feun de senaa de bén de lénva deun eunna streutteua de noutra réjón.

Lo patoué pou pa itre digropoù di conteste istorique iaou l'é crèisì é de la queulteua que reprézénte. Pe seutte rèizón le rancontre l'an, protso i bén de lénva, euncò de momàn pe resté eunsemblo a la fasón valdoténa.

Cougnitre pi d'an lenva, euncò salle minoritére, l'é an retsesse queulterella é, i mimo tén, an valeur eumpourtanta deun le rélachón personnelle. Cougnitre le fondemén de noutra queulteua l'é an bagga neseusséa pe comprénde mioù la réalitoù iaou no vequèisén.

Lo bén de lénva de patoué l'é eungn'ocajón de fourmachón que deue bién, pe fiye vin-ì voya de nen saèi de pi é pe toutchì de protso eun patrimouéno queulterel reutso é uneucco.

Archive manifeste Course de patoué

Archive manifeste é dépliàn Bén de lénva