Tsertsa

Dichonéo

Contenù di site

Multimédià

Teste eun patoué

Documàn

Téatro populéro eun patoué  

(patoué di-z-Amaveulle)

La fonchón di téatro populéro eun Val d’Outa pou itre d’estrà bièn splequéye atò an fraze que Alexis Bétemps, dedeun eun livro su si argumàn, écrit : “Lo téatro populéro eun patoué conserve l’idantitó valdoténa mioù que tot a sor de-z-archive péqué l’espréchón téatrala, mimo se pouije deun na soursa queulterella gropéye i pasó, l’et eun mimo ten alavia, féte pe voueu lo dzor é, catche cou…fenque pe demàn”.

Lo téatro populéro l’è eun gré de vardé an plase eun premie leugne deun lo panoramà queulterel de la réjón : co i dzor de voueu de djézén-e de compagnì que resiton eun patoué baillon via i séne di déféen téatro valdotèn.

La proua de seutta pachón pe l’ar dramateucca se concrétize ver la feun di-z-àn setanta : catche compagnì téatrale désidon de se beutté eunsemblo é batèison la Fédérachón Valdoténa di Téatro Populéro (FVTP). Lo beut l’è si de se prédjé euntre compagnì, de pouché é difujé l’attivitó téatrala eun patoué é d’organizé de cours pe édjé le compagnì a crèite.

Deun lo 1980, la Fédérachón, eun collaborachón avouì l’aministrachón réjonala, organize lo Printemps Théâtral. Tcheu le-z-àn le compagnì se baillon lo mot pe beutté eun valeur le leur capasitó arteusteuque. Gneun l’è ateur de proféchón, mi si randévoù l’è, d’eun coutì, l’occajón pe se moutré a eun nombreu pebleuque è, de l’atro, de moutré étò la retsesse di déféèn patoué de noutra réjón.

Lo lon de sisse-z-àn, tsaque compagnì que l’a partisipó i déféente-z- édichón, s’è féte recougnitre pe eungn’idantitó bièn spésefeucca, fuche pe le fon de séne que pe la fasón de resité é pe le téme cherdù. N’a qui l’a voya de fiye pensé comme le Beguio de Vatornentse, de fiye riye comme La Betise di-z-Amaveulle ou Lo Beufet d’Arnà; n’a qui l’a tsertchà de tsemeun pi particuillé comme La Veilla de Tsateillón.

Mimo se fé po partia de la FVTP, la compagnì téatrala pi viille l’è salla di Charaban: nèisua d’eungn’idó di Comité des Traditions Valdôtaines deun lo 1958 é animéye pe René Willien prézente de pise que tantoù fran refléchì eun beuttèn eungn’évidanse le défó di valdotèn é de la poleteucca de tchi no, mi, lo pi chovèn, son féte p’amezé é eunvaléyé le dzi.

Deun seutta séchón

Tourna avouì mè

La Saison culturelle 2011/2012 propouze pe lo premii cou eun spétacllo de mezeucca eun patoué, baga noua euntre le propozichón queulterelle de la Val d'Ousta

Lli tot