(patoué di-z-Amaveulle)
Gneun pou diye de djeusto a queunta épocca le-z-ommo l’an eungnouó de baillé eun non i llouà que l’ayàn a l’entor, mi l’et eungn’évoluchón qu’eun retroue deun totte le sivilizachón.
Le toponimo démoutron de magnie réella lo fé que « l’ommo l’è viìn patrón di téritouéo » [1] é l’an eungn’eumpourtanse fondementala deun le sivilizachón rurale, perqué pemetton a tsaqueun de se retroué deun l’espase, de beutté de tarméo i bièn é de traché de confeun ou de limitte i téritouéo. Deun la sosiétó rurala valdoténa, tsaque pro, tsaque ru é tsaque bouque l’at eun non.
É sisse non, l’ommo l’a teria-le foua de se cougnisanse é de signa imajinachón : l’è pai que la toponimia l’et an soursa euncontournabla d’eunformachón ieui eun retroue le trase di travaill de l’ommo, l’organizachón sochala, le tsandzemèn climateucco é le modificachón de la lenva. [2]
La toponimia reprézente adón an soursa de référanse eundeuspensabla pe cougnitre l’istouére é la queulteua d’an comunitó. L’è can mimo eun patrimouéno bièn frajillo, perqué la pi par di non de llouà, seurtoù sisse que no lèi diyèn microtoponimo, son pasó a la memouée, lo lon di siécllo, maque a vouése. Eun mimo ten, pe sen que l’è di non di localitó pi grouse, la fourma écritte que le-z-à tramandó l’è po itéye to di lon coéranta é sacante non de llouà son arrevó canque a no avouì de fourme déféente.
Eun partèn de la dobbla nésésitó de beutté odre deun le dénominachón di quemeun-e, di veladzo grou é pi petchoù é di localitó preunsipale é de vardé tcheu
le toponimo di llouà valdotèn, l’Aministrachón réjonala l’a lanchà é organijà de pi pouza dou projé ambicheu :
- Rendre ofichel le non de llouà di déféente quemeun-e valdoténe ;
- L’eunquéte toponemeucca.
[1] A. Bétemps, Toponymie rurale et mémoire narrative dans « Nouvelles du Centre d'Études Francoprovençales R. Willien », n° 46/2002, Saint-Nicolas (AO).
[2] Ibid.
