(patoué di-z-Amaveulle)
La quemeun-a de Donnas se troue a 320 mètre d’otcheui, deun la partia sud-oriantala de la Val d’Outa. Eungn arrivèn di Piémón, l’è la seconda parotse eun diréchón de Veulla, lo chef-lieu de la réjón.
Lo climà bramente dous que la caratérize l’a d’estrà favorizó, lo lon di siéclle, l’agriqueulteua. Euntremì le cultivachón pi viille é que baillon de pi, la veugne l’at an plase deussù tot, magrì le bondante pente di térèn tot a l’entor.
Su le dicllo i solèi, le Donaseun l’an baatì de terasse tigne su pe de meur que eun catche llouà son aat belle catro mètre.
Le terasse, eumpourtante euvre de constrechón rurala, ateurion l’atenchón de tcheu sisse que pason pe la Basa Valló.
Lo sépadzo pi plantó l’è san manqué lo Nebbiolo/Picotendro pe de gran veun rodzo que se vardon é que no retrouèn dza deun lo 1200. Eun plante étò la Freisa, lo Neyret é le sépadzo otoctone Vien de Nus é Fumin. Pe le veun blan, eun plantae dza cheur deun lo 1800 l’Erbaluce é dérimente lo Pinot Gris.
Deun lo 1956, l’et itéye féte la premiye Fita di rezeun de Donnas, deun lo beut de valorizé seutta prodechón.
La fita se fé de riilla la premiye demendze d’otobre é l’et organizéye pe la pro loco eun collaborachón avouì l’aministrachón de la quemeun-a, le Crotte coopérative de Donnas é la Réjón otonomma Val d’Outa.
Deun lo 2001 se son djeuntéye euncó le quemeun-e de Arnà é Montjovet que partesipon a la fita avouì leur vitiqueulteur eun condzeblèn le fose pe beutté eun valeur le veun de la réjón.
Dèi se premiye édechón, la fita l’a todzor mantiìn le-z-élémàn de la tradechón que l’an a que vire avouì lo veun é le vitiqueulteur, mi deun lo ten l’a saù étò euntroduiye de bague nouvile pe le mèinoù, le dzoveun-o é le mouèn dzoveun-o, le sportif.
La dzornó pi eumpourtanta l’è la demendze. Dèi lo mateun, eun pi di-z-espozechón de peunteue é de fotografie aprestéye pe la fita, y è la tradichonella confrontachón di rezeun évaluéye pe eun jurì d’esper, dèisèn l’attribuchón di pri Grappolo d’Oro (Rappa d’Or).
L’è eunna fita bo so sentua pe totta la populachón é seurtoù pe le vignerón.
Voueu lo dzor, caze tcheu le vitiqueulteur son eunscrì i Crotte Coopérative de Donnas. Seutta crotta l’è nèisua deun lo 1971 pe volontó d’eun groupe de vignerón, aprì avèi otiìn, grase i D.P.R. (Décré di Prézidàn de la Répebleucca) di 8 févrì 1971, l’Apélachón d’Orijine Controléye que défèn é garantèi la caletó é l’otantisitó di veun. Seutta coopérativa l’a de moyèn de vinificachón d’estrà moderno, an londze rentse de bosse de tséno pe eunviéillì lo veun é recouille le rezeun di-z-eunscrì, fé lo veun é lo ven.
Deun lo 2011, la Crotta l’a fé se carent’an, fran eungn’occajón de la 55ima édechón de la Fita di rezeun. Eungn anniverséo eumpourtàn que fé pensé, seurtoù i vioù vignerón, a sen que l’et itéye é a sen que saré la vitiqueulteua pe Donnas.
