Tsertsa

Dichonéo

Contenù di site

Multimédià

Teste eun patoué

Documàn

La prosechón de Cunéy

(patoué di-z-Amaveulle)

Plachà i sondzón de la comba de Sen-Bartouloumì, deun la parotse de Nus, lo santuéo de Cunéy l’è lo pi aat d’Eroppa (2.656 mètre). Avouì de bèque tot a l’entor, no moutre eun péizadzo sarvadzo de aata montagne.

L’è fran de la conformachón di téritouéo que no veun son toponimo : son non voudrie diye «  i cu de la nèi ». Lo santuéo de Cunéy semblerie itre lo pi vioù de la réjón, mimo se no sen po cheur de signa orijinne. Le premì doquemèn cougnù que repourton lo non de seutta tsapalla dédiéye a Noutra-Damma- de la Nèi de Cunéì, son di 1656.

Lo fé de baatì an tsapalla deun si llouà s’espleuque deun na conta que prèdze d’eungn’estatua de la Vierje que, tramouéye deun d’atre llouà, tornae tcheu le cou i cllapèi de Cunéy.

La particularitó de seutte streteue relijeuze son le ex-voto, de peunteue comandéye pe de dzi que l’ayàn resù an grase é bailla-le i santuéo pe remersiemèn.

Le pi vioù ex-voto di santuéo de Cunéy l’an pi de dou siéclle. Son seurtoù de don de dzi de Nus ou de parotse protso, mi di Canavé é de d’atre llouà étò. Dérimente son itó restoró é, tchica pe cou, espouzó deun lo santuéo dedeun an tsambra esprés.

Lo 5 oût, a Cunéy, comme deun d’atre santuéo valdotèn dedià a la sente Vierje, eun fé la fita de Noutra-Damma- de-la-Nèi. Si dzor s’è todzor vardó deun lo ten n’eumporte queun sièye lo dzor de la senaa.

Pe arrevé i santuéo n’a po de prosechón tcheut ensemblo, mi n’a déféente possibilitó. Catcheun cher de partì a pià de Lignàn, d’atre, pe fiye pi vitto, profiton di tsemeun trachà que renque pe si dzor son iver. Cattro tsemeun pourton i santuéo. Eun cou, eun partchè di veladzo de Lignàn a pià é atò le melet.

Lo mateun eun di dave messe : la premie ver 8 euye é demì é la messa granta eun la di defoua ver 10 é demì. Can seutta messa leuvre, comenche la prosechón ver la fontan-a que l’è a apepré 200 mètre di santuéo.

La creu ivre la prosechón, dèisèn lèi son le fidélo, le tsantre é d’atre parotseun é to lo lon, eun tsante le litanie.  

Dèi qu’eungn arreuve a la fontan-a,  seumbole de l’orijine de totte le-z-éve de la pégna comba de Sen-Bartouloumì, l’enquerà moille la creu deun lo ru tri cou (tri cou son itó le dzor que Jézù l’a pasó deun lo tombó devàn que resusité) pe bén-ì l’éve que pourtèye todilón la via pertot.

Aprì si rite de l’immerchón de la creu, l’è lo momàn de maenda servia pe sisse que teugnon lo refuje ou que tsaqueun l’a pourtó deun son tascapàn.

A la feun de la dzornó, eun fé l’anchère di bague que le dzi l’an baillà i profì di santuéo.

Mimo se catche tsandzemèn lèi son itó, la prosechón de Cunéy é le rite que lèi van avouì se son vardó deun lo ten grase i jénérachón passéye que l’an saù moutré i nouvile l’attatsemèn a la relijón.

Eun martse ver lo Santuéo
Eun martse ver lo Santuéo
Pe allé su i Santuéro lèi son de passadzo defesilo : de tsén-e pe se tiìn é eun sentì bièn étret deussù de penne que fan viìn le-z-étorneun
Pe allé su i Santuéro lèi son de passadzo defesilo : de tsén-e pe se tiìn é eun sentì bièn étret deussù de penne que fan viìn le-z-étorneun
Deun la petchouda tsapalla, l’enquerà di Messa premie
Deun la petchouda tsapalla, l’enquerà di Messa premie
La prosechón comense é la grousa Creu de bouque va devàn pe guedé le fidélo
La prosechón comense é la grousa Creu de bouque va devàn pe guedé le fidélo
La londze rentse de la prosechón s’approtse di ru pe assisté a la bénédechón de l’éve
La londze rentse de la prosechón s’approtse di ru pe assisté a la bénédechón de l’éve
Le prie arbeillà de blan é le fidélo, eun dérì l’atro, pason a l'ensón di ru
Le prie arbeillà de blan é le fidélo, eun dérì l’atro, pason a l'ensón di ru
Lo prie moille la Creu de bouque deun l’éve di ru : l’è lo momàn que baille pi d’émochón
Lo prie moille la Creu de bouque deun l’éve di ru : l’è lo momàn que baille pi d’émochón
Le fidélo pouijon l’éve bén-ia atò le man é la pason su le joué pe le prézervé di maladì
Le fidélo pouijon l’éve bén-ia atò le man é la pason su le joué pe le prézervé di maladì
Le dzi, vioù, dzoveun-o é mèinoù, préyon avouì dévochón
Le dzi, vioù, dzoveun-o é mèinoù, préyon avouì dévochón
Dret deussù l’èiter de bèrio, eungn ommo beutte a l’anchère totta sor de bague pe recouillé de sou pe la tsapalla s
Dret deussù l’èiter de bèrio, eungn ommo beutte a l’anchère totta sor de bague pe recouillé de sou pe la tsapalla s
A la seremonie partesipon, avouì l’enquerà di veladzo, eun mouì de prie de d’atre parotse
A la seremonie partesipon, avouì l’enquerà di veladzo, eun mouì de prie de d’atre parotse

Plan

Vidéó

La prosechón de Cunéy

Si site permè de vo mandér d'atre «cookies» (témouèn de connéchón). Se vo asétade l'utilizachón di «cookies» cliccade su OK, se vo vouléde pi d'eunformachón ou vo vouléde refezé, alléde a la padze di-z-eunformachón.

Padze d'eunformachón