Tsertsa

Dichonéo

Contenù di site

Multimédià

Teste eun patoué

Documàn

Lo livro

Lo teste de Lo ninno è lo tsaret - la nouila publicachón dessin-aye pe Francesco Tullio Altan - prèn eunspirachón di conte de la tradichón orala é, grase i fé que veun prézentoù caze comme eun djouà, permettré i dzouin-o de dicouvrèi avouì plèizì lo patoué é la queulteua valdoténa.

Eungn a cherdì seutta conta pe diffiente rèizón : la retsesse di-z-élémàn de l'etnografia que baille i dzouin-o que lion lo livro la possibilitoù de se retroué deun le personadzo, la seumpla streutteua, lo langadzo é, pe fenì, lo fé que n'at de bon-e é rachurante valeue.

Comme pe La conta di ralo teste de la conta l'è pa itoù eumprimoù. Eugn a libramente desidoù de pa chédre eunna variante partiqueillia de francoprovensal, péqué eun souette de beutté eun valeue to lo reutso patrimouéno leungueusteucco de noutra téra.

Le teste pouon itre ditchardjà deun lo site é icrì ou euncolloù si le padze di livro, deun le diffiente  variante de patoué. To permettré eun pi i pégno icouillì de partisipì a batì la conta. Le dériye padze di livro prézenton étó lo teste orijinal de la conta, eugn italièn é eun fransé, comme sa verchón deun lo patoué de Véèye.

Lo livro veun pèi lé eun moublo que le-z-espèe euntchardjà de moutré lo patoué deun le nouì course pouon pi eumpléyì é prende eunspirachón pe batì eun parcoù didatteucco retso pe le conténù mi étó amuzàn é agréablo.

Seutta fasón de traaillì permé de sensibilizé le dzouin-o a eunna noua lenva que deun le dérì ten l'a trouoù sa plase deun l'icoula é que s'apréste pèi pe eun demàn.

Eun s'approtsèn i mèinoù de seutta fasón, diffienta pe salla eumpléyaye la coutimma pe moutré le lenve, saré poussiblo - é so sensa avèi ren a que vére avouì le capasitoù que l'an le dzi que chouion le course - beutté de nouì élémàn didatteucco é améillorì l'apprentissadzo eun le beuttèn d'eun conteste que l'è tradichonnel (le moublo é le prateque prézentaye féyon reféranse a la sivilizachón valdoténa) é i mimo ten llattoù a la fameuille (la conta l'a comme protagoniste de mèinoù que prèdzon avouì le paolle seumple di  prèdjì eunfanteuillón)

Eun partèn di-z-élémàn de seutta conta, voualà caque argumàn d'approfondissemèn poussiblo :

- lo veuladzo de la campagne

- le mouayèn de transpòo tradichonnel

- le mitchì llattoù i bouque

- le traaille de la campagne

Seutta publicachón pou itre eumpléyaye pa maque pe le course de francoprovensal mi étó defoua de si conteste, pe tcheu sisse que souetton féye cougnitre lo patoué a leue mèinoù. Si livro, eungn éffé, l'è complet d'eun retso dossié didatteucco, avouì de fiche é de-z-éizersicho leungueusteucco.

D'atro matériel didatteucco, llattoù a la conta Lo Ninno è lo tsaret pou itre ditchardjà seumplamente di site : glosséo dessin-à, éizersicho é djouà leungueusteucco, fiche pe coloré, é d'atro euncó.

(patoué dé Bretsón)

Dehtchardjeu vents tsé padje le bé dessèn, feut pé o famous illuchtratour Altan, qu'i son vents o lévro dou Ninno è lo tsaret, couénta qu'a vièn dou patrimouéne traditsionél dé a Val d'Ohta.

Ma dou qu'i son-té levrà le mot dé a couénta ?

Poeu troé-ie vents a sétsión di teste dou qu'i poeu tserde a versión qu'i lammeu mach ou mentén di diférénte calétà dé patoué qu'i vo propozén.

Si site permè de vo mandér d'atre «cookies» (témouèn de connéchón). Se vo asétade l'utilizachón di «cookies» cliccade su OK, se vo vouléde pi d'eunformachón ou vo vouléde refezé, alléde a la padze di-z-eunformachón.

Padze d'eunformachón