Lo sistémo de grafia

(patoué di-z-Amaveulle)

Lo sistémo de grafia que l’et itó adotó pe la trascrechón di toponimo l’a comme baze l’ortografia di fransé, avouì can mimo sacante éiséchón nésesée pe rendre amoddo totte le coleur di patoué é eun djeuntèn étò de grafémo particuillé pe le son que lo fransé l’a po.

• L’assàn grave marque que la voyella l’et iverta (è).
• L’assàn égù marque que la voyella l’è clloute (é).
• L’assàn circonflexe l’et eumpléyà pe marqué la londjeui d’an voyella (â), comme deun lo fransé « pâte ».
• Lo trémà marque eun partadzo euntre dae voyelle, pe tsandjé eun ditongue eun iatus, comme deun lo fransé « maïs ».

L’assàn d’euntensitó l’è marcó eun soulegnèn la voyella (ou lo diagrammo) toneucca (a ; œ) comme deun lo mot « barma).

Pe de rèizón évidente, l’assàn toneucco l’è po marcó su le mot monosilabeucco.

a fr. pas  

i fr. lit

é fr. pré 

e it. pane 

è fr. près 

ou fr. cou 

ó fr. peau (catche cou fenque pi cllout)

o it. vino 

ò fr. porte 

u fr. pur 

œ fr. peu (mi marque étò la lettra e meutta que, can mimo, eun patoué l’a po le mime caletó qu’eun fransé, vu que l’è bièn pi marquéye)

oè fr. fleur 

oé corespón a eun son œ bièn cllout, tepeucco de la comba de Vatornentse é de catche quemeun-e protso.

• La caletó di voyelle nazale, sti que, d’évidense, pe lo son nazal, l’è la mima di voyelle orale que lèi van avouì (un = u+n ; in = i+n).
• Tsaque voyella ou djemivoyella dedeun eun ditongue varde son son (ai = a+i ; oi = o+i ; au = a+u ; …)

p fr. pain 

b fr. bon 

t fr. ton 

d fr. dent 

c fr. coq  (lo grafémo c l’è maque eumpléyà pe reproduiye eun son véléro, de gordze ; l’è maque eumpléyà devàn le voyelle a, o, u, œ, ou)

g fr. gare  (son validde le mime oservachón féte pe la lettra c)

qu fr. qui (corespón i son c é l’et eumpléyà devàn e, i)

gu fr. guerre (corespón i son g é l’et eumpléyà devàn e, i)

m fr. main 

n fr. nez (dental)

n it. ancora (véléro)

n- s’ajèi de la lettra n vélére chouua d’an voyella comme, pe ezeumplo, deun lo mot patoué fontan-a, « source d’eau ». Catche cou si son n se prononche gnanca, mi nazalise la voyella que y è devàn. Deun catche patoué, comme si de Cogne, si son n- pou itre chouù pe an lettra n dentala (pe ezeumplo : fontan-na).

-nn eun l’eumplèye a la feun d’eun mot pe eundequé eun son n dental (fr. nez). Seutta caratéreusteucca l’è tepeucca de sertèn llouà de la basa Valló, comme Arnad.

gn fr. vigne

ts it. zio

dz it. zero

tch it. cena

dj it. gelo

f fr. feu

v fr. vie

s fr. sain

z fr. zone, rose

ch fr. chat

j fr. jeu

h marque tcheu le son aspiró qu’eun retroue deun le patoué valdotèn : a l’envión di mot hitta « cette » ; eun pozechón euntervocaleucca tiha « tête » ; dedeun lo mot, avouì an consonna devàn (ou an voyella nazala) panhœ « ventre » ; a la feun di mot Dounah « Donnas » ; eun pozechón préocluziva téhta « tête », ieui lo degré de frechón pou tsandjé d’eun patoué a l’atro ; a l’envión di mot chouù pa la consonna palatala ll, hllenda « cloison »,…

l fr. loup

ll/ill it. foglio – eungn eumplèye ll a l’envión di mot ou aprì an consonna (ez. cllou « clou »), deun le-z-atre cas eungn eumplèye ill (goillœ « flaque d’eau »)

r fr. rat (an marca soletta r l’et eumpléyéye pe le déféente vibrante di patoué valdotèn)

y eungn eumpléye la djemiconsonna seurtoù euntre dae voyelle (ez. payœ « salaire ») sensa que so tsandzèye la prononche di dae voyelle protso. L’et eumpléyà co deun d’atre cas.

‘ s’ajèi deun seumbole que marque lo cou de glotte, tepeucco di patoué de Fénis é de Saint-Marcel, comme deun lo mot ‘olèi « soleil ».

Deun le cas rer ieui lo trascriteur l’a retiìn eumpourtant marqué la londjeui de sertèn son reprézentó pe eun digrammo ou eun trigrammo, eungn a redobló maque lo premì élémèn de la secanse (ts/tts ; tch/ttch ; dj/ddj ;…)