(patoué di-z-Amaveulle)
Sit an étò, a coutì di Concour Cerlogne, l’Assessorà réjonal di bièn queulterel, di tourisme, di-z-espor é di commerse l'a propouzó i-z-écoulle eun parcour ludeucco pe s’approtché i patoué.
Si parcour de 8 séanse l’et itó développó eun partèn de la peblecachón « Les femmes géantes », atò le désèn di fameu illustrateur Altan que se llette a eun projé pi lardzo que totse lo mondo di léjande valdoténe.
Le-z-attivitó se son dévelopéye avouì la finalitó de réalizé eun produì que l’arie partisipó a la premie édechón di Pri « Federica Diémoz”, pe rapélé seutta fenna professeur ordinéo de dialectolojì é socholengueusteucca de l’Universitó de Neuchâtel, orijinére de Rouéizàn.
Bon-a la reponsa di-z-écoulle : 8 cllasse l’an partesipó a si parcour, dave di primére é chouì di-z- écoulle di petchoù é 5 travaill son itó prézentó i Jurì. Teteun, a coza di difficultó de seutta périodda de pandémì, tcheu le travaill son itó asétó, mi gneun l’a gagnà lo pri.
Vezetéde la séchón di sito patoisvda.org dediéye i travaill su lo Patoué a l’écoulla pe retroué le vidéó que conton la conta di Fenne jéante deun lo patoué di-z-Amaveulle é de Arnà.