(patoué di-z-Amaveulle)
Lo Dichonéro eun leugne di patoué valdotèn s’eunretsèi d’an nouvila variétó !
Eungn éffé, dèi catche dzor, vo pouéde consulté lo dichonéro de baze de la quemeun-a de La Sala, avouì apepré 1700 mot, réalizó avouì la collaborachón de Félicie Charrey, eunformateur pe seutta parotse.
La caratéreusteucca preunsipala di Dichonéro l’è la possibilitó d’acouté le déféèn patoué de la vouése de sisse que lo prèdzon pai n’a po fata de se tracaché de la grafia é de se limitte. L’et eungn estremèn précheu pe la difujón de la cougnisanse di lenve de la Val d’Outa, mi étò pe eunretsì sen que vo sode dza di patoué é fenque pe vo-z-édjé a lo aprende.
Eun pi de to so, dou nouvi-z-appor se djeunton i Trézor de texte : vo pouéde llire é acouté de déféèn texte ou beun lo mimo deun catche variétó de francoprovansal. Dave verchón deun lo patoué de Fin-is é deun si de Tchalan-Damón de l’Anfàn Prodeuggo, la parabola dwe l’évanjile d’estra cougnua que l’et itéye objé d’éteudzo, i XIX siéclle, de la par di lenguiste Bernardino Biondelli.
Comme la coteumma, lo Guetset lenguesteucco remersie se collaborateur pe leur disponibilitó é leur pachón a défendre lo patoué : l’è fran grase a leur que lo Dichonéro veun maamàn pi reutso.