(patoué dé Bretsón)
Devéndro 9 guijémbro 2022, a 16h, vents a sala di conféréntse dou Muzé arquéolojécco réjonal, ou sarat prézentà ou peblécco o lévro Alimentation paysanne en Vallée d’Aoste. Témoignages du patrimoine culturel immatériel, publià pé Le Château Édition.
Réalizà pé l’Assessorà di Bén queulterel, dou Tourisme, dé y Echport é dou Comerse – tsou lévro a l’é o rézultat dou reutcho travai dé rétchertcha minà én Val d’Ohta, éntré o 2017 é o 2019, pé o projet dé Coopératsión territoriala transnatsionala ALPFOODWAY. A cross-disciplinary, transnational and partecipative approach to Alpine food cultural heritage.
A rétchertcha so o patrimouéne queulterel immatériel da nohtra réjón a s’énretchich, peu parì, d’eun élémèn émportàn qu’ou permettrà i tchertcheur é ou gran peblécco dé s’aprotché ou travai dé valorizatsión etnografécca é antropolojécca qué o BREL (Bureau Régional Ethnologie et Linguistique) ou porta avante dé pieu l’ora.
O tchertcheur Alexis Bétemps é l’éditour Nicola Alessi i partisipéràn a rehcontra, énsémbio a Daria Jorioz, diridjénta dé l’Echtreteurra Echpozitsión é promotsión dé l’idantité queulterella.