(patoué de La Sola)
La 61éima édechón di Concours de patois Abbé Jean-Baptiste Cerlogne l’è partia !
Pe sit an d’ecoula 2022/2023, l’argumàn propozoou l’è « Prèdjè avouéi lo queuo ». Le hllasse que partisipon dèyon fée an retsertse su la lenva ompléyée pe l’esprechón di santimàn é di-z-émochón : le motte, méi étò lo teumbro de vouése, l’euntonachón, le jeste que von avouéi la paolla é que tsandzon on pasèn d’an lenva a l’otra.
Partisipéi i Concours Cerlogne l’ou dée fée on tralie tcheutte onsemblo lo lon de to l’an d’écoula ; si tralie dè aprotchè le méinoo i patoué é dè lai fée cognéihe tcheu le-z-aspè de l’argumàn propozoou, on s’apoyèn su totte le desepleunne itudjée.
Le-z-écoliéi son amén-oou don si parcoo d’animateuo queulterelle espèa on patoué : de 6 a 8 randévoù on hllasse.
A la feun di tralie iàn peu la féiha. Sit an l’è prevua eugn Oyace ieui saè étò baillà lo pri « Ami de Cerlogne » a tcheu le métre que l’an partisipoou i Concours Cerlogne dai pi de djée-z-àn de ten.