55émo Concours Cerlogne

(patoué d'Arnad)

Pé la 55éma édichón dou Concours Cerlogne lo téma herdì y at ihtà Rire, Courir, Jouer.

La féhta finala y at ihtà féte a Pontèi lo 11 é lo 12 mai dou 2017.

(patoué dé Bretsón)

O sujé tserdù pé o 54° Concours Cerlogne l'é a continuatsión dé tsou dé l'an pasà, A dehquieverta di nohtre quemeunne : le vièi saé-fére.

Le partésipàn i l'an aprofondì un, ou cahcùn, di "saé-fére" troà l'an pasà.

A féhta finala l'é ichtà feutta é Charvensod o 19 é o 20 dé mai 2016.

(patoué de Tsaensoù)

Lo sujé di 53° Concoù Cerlogne l'è la dicouverta di quemeue valdoténe : le savèi fée.

Retchertchì le cougnissanse é le savèi-féye de eunna quemeua lou diye prité attenchón a to sen que eun sa ou que eun fé deun la quemeua, eun prègnèn étó eun considérachón le bague que no sen accotumoù a féye, perqué de cou sen que semble banal catse de-z-eunformachón eumpourtante.

Tcheu le savèi fée son eunna produchón sosiala, eun partèn di pi naterel di comportemèn (coure, pourté, accoutchì, drimì).

(patoué de Tsaensoù)

Lo sujé cherdì pe sit an d'icoulla 2013-2014 l'è : A la déqueverta de noutre veulladzo é de leur prodouì .

La fita finala de la 52a édichón di Concour Cerlogne l'é itoù féta deun la quemeua de Donnas di 21 i 23 de mi 2014.

(patoué dé Bretsón)

L'arguemèn dou 51° Concours Cerlogne, qu'ou l'at ichtà feut a La Salle, régarda le béhte. Quinta a l'é-té l'émportantsa pé le minà dé poé vére é cogniche le béhte ? Quinte i son-té le rélatsión qu'i sé formon éntré le béhte é y ommo ? Ommo, feméle é minà i l'an-té o mémo janre dé rapport avó le béhte ? Quin a l'é-té o pocht da béhte vents le mite ?

(patoué de Oveuzo)

Lo Concours Cerlogne l'arue i seun djemì sièclle de vîa !

Pe l'an scolère 2011/2012 eungn a cherdù l'argumàn : L'ecoulla, lo queue di veladzo, l'ou dî le relachón que llèzon l'ecoulla a la vîa di veladzo ou di cartchì, le-z-achón partadjéye, le tsandzo, le colaborachón, le fihe organizéye eunsemblo, l'éidzo que le méinó de l'ecoulla baillon pe organizé an fiha é i mimo ten l'eungadzemèn di dzi di veladzo ou di cartchì pe la réussia de an manifestachón de l'ecoulla.

La fiha que hllou la 50a édichón l'è-pe i mèi de mi 2012 deun la quemin-a de Fén-is.

(patoué de Veullanoua)

Euntrì lo 16 é lo 18 mi 2011 l'a itaye eun Vioun-a la 49a édichón di Concour Cerlogne. Euncò hit an le-z-eunségnàn é le-z-ecouillì di-z-ecoule de nouha réjón l'an repondù avouì pachón i Concour é l'an traillà eunsemblo su lo tème propouzó : « Les rites de passage », que se pouon defin-ì comme l'eunsemblo di riille é di manifestachón rituelle que dirijon la via d'an comunitó.
Hône baillérè lo bienvin-ì i 1337 mèinoù di-z-ecoule maternelle, i 1437 mèinoù di-z-ecoule primére é i 116 écouillì di-z-ecoule mouayenne. Le-z-eunségnàn eumpégnà deun hi tour de force, sarèn hit an 173 pe le maternelle, 208 pe la primére é 15 pe le mouayenne. Fou-pe euncò djeunté le 293 partésipàn que vignon di Valode di Piémón, de la Savouè é di Puille (245 écouillì accompagnà pe 48 eunségnàn).