Lo site di patouè se renouelle !
Pe posèi acapé pi fasilamente le contenù, seurtoù hise didateucco, dedeun le diféente sèchòn di site n'en pensó a an nouila organizachòn di-z-argumàn. Dèi vouì to hen que pou ihé eumplèyà comèn supor a l'aprentisadzo di patouè vo lo trouode dedeun la mima sèchòn : Apprende.
Eun pi di vouése dza prézente - comme halle dediéye a la Grammère, a la Grafiya é i Supor pe la didateucca - vo pouode detchardjé de heutta sèchòn le-z-illustrachòn é le fiche pe le mèinoù (mi étò de supor pe le grou) comèn, pe-r-ezeumplo, le-z-ézersicho de l'École Populaire de Patois é coutche lèiteue plèizente.
Eun pi n'en réalizó an nouva sèchòn - Promochòn - que prézente, complette de lièn, le preunsipalle attivitó réalizéye é peblisizéye de l'Asessorà de l'éducachòn é de la queulteua, pe defendre é valorizé lo patouè. Heutta sèchòn l'è euntégréye di contenù de « Peblicachòn », sèchòn que repourte le livro que prèdzon patouè é le livro que prèdzon di patouè.
Dedeun la sèchòn Lenva vo trouérì todzor de contenù que prézenton lo patouè d'eun poueun de vuya siantefeucco é dedeun a sèchòn Queulteua an séléchòn di preunsipal oteur patouazàn é eun grou requeui de halla que no pouèn querié « littérateua populéa » : tsanhòn, conte, contine é ditòn.
La sèchòn Glosséo crèi todzor, mersì i nouilo mo é i nouilo teste di diféente variante que l'è pousiblo llire mi étò écouté de la viva vouése di témouèn que no-ze le-z-àn fournì.
Pe cougnihe le servicho di Gnalèi, llizodde le-z-eunfourmachòn de la sèchòn Guetset é pe le dispozichòn que regardon le projè de la llouè 482/99 la sèchòn Projè.
Le sèchòn Noalle é Événemèn reuston égalle a devàn ; vo lèi trouérì tcheu le randevoù eumpourtàn é le novitó su l'univer di patouè.
Boun-a navigachòn a tcheutte !