(patoué dé Bretsón)
« L'é mae a lénga qu'a fèi le djen égal. Égal l'é quieui ou sa prèdjé é comprénde y atre. Qu'ou séa reutcho ou poro l'é tutùn. Bachta qu'ou prèdjet. [...] É ou bachta sur pa mae o tayàn qué vents o mondo ou couénta ren. Le djen l'an manca dé sé lammé co pi outtre di confìn. Donca ou fat aprénde moué dé léngue é totte vive ».
don Milani, Lettra a eunna Méhtra
Ou lon dé l'iforés 2013, o patoué l'at intrà vents y ehcole da Val d'Ohta, mersì a un projè echpérimantal qu'ou l'a prévù 83 cours facultatif - feut foura dé l'orére di létsión - ténì dé 45 méhtre dé patoué qu'i l'an choù un cours echprés pé a didattécca da lénga.
Le méhtre l'an impià eunna métodde gnoa é créativa pé fére éntéressé y ehcoyé. Parì o patoué pou ése vu pa macque comme lénga da traditsión, ma acheu comme lénga dé éntégratsión é patrimouéne dé touit é pout alé a alardjì le cognichéntse di minà.
Le prodouit dé tsétta premira echpériéntsa - echtremèn didattécco feut dé l'Assessorà é matériél feut di méhtre - son orra a dichpozétsión dé touit.
