(patoué di-z-Amaveulle)
La grafia di toponimo l’è todzor eun tème délecat: sacante son le cas de grafie déféente pe lo mimo toponimo deun lo téritouéo réjonal é comunal étò. Lo tsemeun de l’ofichalizachón l’è donque nèisù pe tsertché de fiché de grafie quemeun-e. L’et eungnouó avouì le dénominachón di 74 quemeun-e valdoténe, projé que l’a pourtó, deun lo 1976, a ofichalizé le non di quemeun-e de la Val d’Outa selón l’articllo 1 de la lloué réjonala n° 61 di 9 désambre 1976.
Pe la queumeun-a chef-lieu de la Réjón son considéró ofichel siye lo non eungn italièn “Aosta” que si eun fransé “Aoste”.
La nésesitó d’avèi de grafie recougnue pe tcheut l’a pourtó a prévire, todzor a travì la lloué n°61/1976, de rendre ofichel co le non di veladzo, petchoù é grou, di llouà é de totte le localitó valdoténe pe décré di Prézidàn de la Jeunte Réjonala, aprì avèi sentù le Quemeun-e euntéréchéye.
La prateucca prévèi que le Quemeun-e mandèyan an demanda ofichella, eun beuttèn bo an lista di localitó a rendre ofichelle. Eun partèn de seutta demanda, eungn ivre eun dossié que repourte pe tsaque toponimo le donné marquéye inque dézot:
- Le grafie pi viille (preuize di Cadastro Sarde, di Cadastro d’orijine, di-z-archive istoreuque, di-z-archive de la parotse é de la quemeun-a);
- Le grafie di dzor de voueu (preuize di carte réjonale ou IGM-Eunstitù Jéografeucco Militéro):
- Le fourme eun patoué (preuize di donné de l’Eunquéte toponemeucca)
Eun parten de si dossié, an Comechón d’esper, eunstituéye comme organe de conseill é de éidzo tecneucco é siantefeucco, fé de propouzechón i Prézidàn de la Réjón pe tsaque toponimo demandó.
La Comechón l’è noméye pe la Jeunte réjonala pe seunqu’an é l’è renouveléye a l’envión de tsaque léjisalteua. Se compouze de di mouente tri membro é po de pi que chouì, cherdù euntre le dirijàn di streteue réjonale compétèn eungn’etnolojie é eun lengueusteucca, eun toponimia, eun vioù doquemèn, eungn’istouére é eun queulteua di téritouéo valdotèn é di comunitó locale, ou beun euntre le spéchaliste deun seutte matchie que fan po par de l’aministrachón.
Can n’a de séanse que l’an eungn euntéré pe eunna colétivitó locala, deun la Comechón entre co eun spéchaliste nommó pe salla colétivitó.
Eun pi, la lloué prévèi que le quemeun-e pouon désidé de djeunté, i non ofichel, de non de leur téritouéo, eun patoué. Sisse non sarén pasó a l’éizamèn de la Comechón.
La Comechón s’esprime su la baze de critéro présì, fichà pe la délibérachón de la Jeunte réjonala n°828 di 20 avrì 2012, comme pe ezeumplo lo fé que la grafia propouzéye sièye salla de la tradechón valdoténa. Donque, s’ajèi de grafie francofone perqué lo fransé l’et itó pe de siécllo la lenva ofichella de la Val d’Outa.
D’atra par, le grafie dèyon tiìn contcho di particularitó di doméne francoprovansal, étò can se dépeuillon de magnie évidenta di fransé. La Comechón, eun pi, l’a désidó de vardé la lettra z finala, que l’è po prononchéye, se la voyella que veun devàn l’et atone (ézeumplo : Bionaz, Perloz,…) é de beutté le lettre d ou t a la feun, pe marqué que la voyella l’è toneucca (ézeumplo: Gignod, Arnad, Norat,…). Eungn a désidó, pe fenì, de vardé l’articllo que y et eun patoué (ézeumplo: Les Combes, Le Clapèy,…).