(patoué de La Sola)
Can l’amoù é le montagne s’acapon, cotsoouza de majique acapite ! Si maise séi, lo laivro « Rites et fêtes » vo-ze amén-e don on voyadzo a la déqueverta di tradechón é di coheumme que lai son a l’entoo di mariadzo on Valoou d’Oouha.
Soèn, lo mariadzo l’è vu comme eun-a di bague pi omportante don la viya d’an dzén-e. De pi, l’è todzò ahatchà a de valeuo queulterelle, de relejón é de tradechón spesefeucque que pason de maniée nateuella d’an jénéachón a l’otra. Le coheumme é le rituelle di mariadzo tsandzon bièn d’an queulteua a l’otra, é l’è fran pe seutta réizón que lo mariadzo l’è on moyèn que permè de ranforchè lo role sosial que tsaqueun l’a don son veladzo u don son paì.