(patoué de Veullanoua)
L'Assessorà de l'éducachón é de la queulteua de la Réjón otonomma Val d'Ousta l'a organizó, pe lo trijimo an, eungn'inisiativa eungn occajón de la Dzornó eunternachonala de la Lenva Maternella pe demase 28 févrì, eun Veulla, i Lisé tecneucco, commersial é pe jomètre, avouì i santre de questchón que l'an an grousa eumportansa deun an Réjón comme la Val d'Ouha, avouì son otonomì istoreucca duua i difiente lenve prédjéte é que, surtoù i dzor de vouì, son an grousa ooportunitó pe le dzouin-o di poste.
Lo lon de la matin-ó l'Assesseur Laurent Viérin l'a prézentó lo concour Ma région multilingue, rezervó a tcheu le-z-élève di-z-ecoule secondée di Ii é di IIn grade, que l'a lo but de sensibilizé le dzoun-io su l'eumpourtanse de conservé lo patrimouéno leungueusteucco é queulterel de tsaque peuple, é que prévèi la réalizachón de eun queur filmà.
L'Assesseur l'a décllaró que, eun lanchèn hi concour, s'espée de sensibilizé le dzoun-io su l'eumpourtanse de la diversitó leungueusteucca é queulterella de magnii que le dzoun-io se rendèyan contcho que le lenve no baillon difièn poueun de vua su lo mondo.
Lo fé de comprendre la diversitó èidze lo dialogue eunterqueulterel, la coéjón sochala é la prospéritó.
An boun-a convivensa euntrì le lenve é le queulteue suppose que tsaque personna l'ache an boun-a cougnisanse de sa lenva, ou di sin-e lenve maternelle. Le mouayèn d'eunfourmachón é le nouile tecnolojì, todzor selón l'Assesseur, pouon contribué a beutté heutta diversitó leungueusteucca é queulterella a dispozichón de tcheu é a devoloppé la cougnisensa di lenve, surtoù pe le Valdotèn pi dzoun-io.
Proclaméte pe la Conférence Générale de l'UNESCO, a noambre di 1999, la Dzornó eunternachonala de la Lenva Maternella l'è sélébréte tsaque an, dèi lo févrì 2000, avouì lo but de sostchan-ì la diversitó leungueusteucca é queulterella é lo plurileunguisme.