(patoué di-z-Amaveulle)
Gran susé pe lo dichon-éo eun leugne, que l’a pasó lo nombro de pi de 100.000 mot dedeun !
Lo projé ambecheu – que deue dèi po mal de-z-àn – l’a comme beut la créachón d’eun dichon-éo pe tsaque varianta locala de patoué valdotèn (pi de setanta eun contèn maque le quemeun-e pi grouse) é, voueu lo dzor, mersì i grou nombro de mot que conteun, l’è viìn eun moyèn eundispensablo pe tcheu sisse que l’an voya de s’aprotché a noutra lenva. Eun moyèn que l’at eun pi an caratéreusteucca spéchala : la possibilitó d’acouté le mot rendjamente de la vouése di témouèn, mersì a la prézanse de l’eunrejistremèn.
Lo dichon-éo eun leugne l’at ara 38 dichon-éo de baze pe tsaqueun di 38 llouà. Eun pi de sisse glosséo, le déféèn patoué valdotèn son reprézentó pe de dichon-éo que son eun tren d’itre levró é pe de séchón de termo spésefeucco (pe ezeumplo, le mot de la flore valdoténa) que veugnon di retserte publiéye su de livro.
Si rezultà estraordinéo l’arie po pouù itre pousibblo sensa l’édzo précheu di collaborateur que lo Guetset Lengueutseucco l’a su to lo téritouéo : de patouazàn pachon-ó que, pe ren di tot, beutton leur ten pe vardé alavia noutra dzenta lenva.