(patoué de Tsaensoù)
Va eun devàn la publicachón di tsapitre di Manuel di bon uzadzo fé pe lo Guetset leungueusteucco de l'Assessorà de l'éducachón é de la queulteua.
Deun seutta tréjima séchón, eun repourte le fasón de diye é le paolle llattaye i momàn iaou eun fé cougnissanse é eun s'accappe.
Le-z-approfondissemèn leungueusteucco euntérechon lo vocabuléo llattoù i fasón de saliyì, étò salle mouèn eumpléyaye comme tanque, é le paolle si le diffiente dimande que eun fé tcheu le dzor : de permì, d'èidzo, de conseill é de perdón.
Eun caro l'è dedià i soué, i complemèn é euncó i momàn can eun va prende lo perdón.
Féye cougnissanse é accappé an dzi pe lo premì cou dimande étò de savèi prèdjì de la fameuille, di-z-iteudzo, di traille é de la rélijón.
N'at étó de situachón iaou l'et eumpourtàn de savèi prèdjì di pi é di mouèn pe tegnì an conversachón mimo avouì an dzi que eun cougnì bièn pocca.
Deun d'atre cas, i contréo, eunna cougnissanse superfisiella pou tchandjì tanque a viìn eun rappor d'amour, avouì to sen que veun de consecanse, finque di poueun de vua leungueusteucco...