Manuel di bon uzadzo di patoué

(patoué de Tsaensoù)

Se louade apprende lo francoprovensal, no conseillèn de vo plondjì deun la lenva é de la prèdjì ! Féyade amitchì avouì le dzi di paì. Féyade la conta avouì vo vezeun, le martchàn, le servèn de la cantin-a, tcheut sisse que pouon itre utillo pe vo-z-eizersì. Pi vo vo espouzade é mouèn vo prèdzade voutra lenva, pi vito vo l'appregnade.

De seu l'è nèissiya l'idoù de créì eun manuel di bon uzadzo di francoprovensal pe qui lou apprendre ou bièn améillorì lo patoué, eungn outì cheur, a la portoù de man, ou pitoù deun clic, pe supérì le diffiqueultoù pi quemeue de la via de tcheu le dzor : prèdjì i téléfonne, féye la spèiza, féye cougnissanse, remersiì...

Si manuel, réalizoù pe lo Guetset leungueusteucco, avouì la collaborachón é lo suppor siantefeucco de Liliana Bertolo é Iris Morandi, deun le variante di patoué de Veulla é di-z-Amaveulle, l'è divijà eun tsapitre, que a tor de role saren-pi publià deun seutta séchón. Vo rappélen-pi, deun la premì padze di site, ou bièn eun mandèn la lettra d'eunformachón di « Gnalèi » a tcheu sisse que son icrièsse, le nouì tsapitre que sarèn publià.

Bon-a letteua !

Annexe

  • Numéró, pèise, mezeuve, couleur

    Queunta l'è la riille jénérala pe apprende le numéró cardinal é le numéró pe beuttì eungn ordre ? Commèn prononchì le frachón, le poursantadzo, le multiplo, le-z-esprechón de canquetoù ? Queunte mezeuve, pamì eumpléyaye deun le-z-atre lenve, son deun la coutimma eun patoué ? Commèn reprézentì le couleur ?

    Documàn pdf (297 KByte)

  • Lo ten

    Comèn considéré lo ten que pase : comèn esprimì le-z-euye, le sèizón, le momàn de la dzornó ? Comèn prèdjì di ten que tsandze ?

    Documàn pdf (1 223 KByte)

  • Féye cougnissanse é s'accapì

    Le-z-approfondissemèn leungueusteucco euntérechon lo vocabuléo llattoù i fasón de saliyì é le paolle si le diffiente dimande que eun fé tcheu le dzor : de permì, d’èidzo, de conseill é de perdón. Eun caro l’è dedià i soué, i complemèn é euncó i momàn can eun va prende lo perdón. Féye cougnissanse é accappé an dzi pe lo premì cou dimande étò de savèi prèdjì de la fameuille, di-z-iteudzo, di traille é de la rélijón.

    Documàn pdf (835 KByte)

  • Atseté

    Lamérió savèi véo cougnissade amodo voutra lenva maternella, lo patoué, pe rappoo i mot llattoù i prodouì de l'alimentachón, i moublo, i-z-arbeillemèn, a l’or, i diboudzet, i journal, i tchaousiye, i parfeun, a l’artizanà, i medesin-e, i fleue, i plante, i cd é i-z-eunstremèn de mezeucca ?

    Documàn pdf (1 569 KByte)

  • Servicho

    Deun si seunquimo tsapitre, eun repourte lo vocabuléro consernàn le servicho de lavapateun, de estétiste, de barbì é de pigneuza, le-z-espréchón é le paolle qu’eun di can eun va eun banca, a la pousta, tchi lo mécanisièn, a la pompa de benzin-a ou bièn can eungn eumplèye le ben pebleuque ou la ditsardze. L’et eun tsapitre bramèn reutso de néolojisme que nèisson can eungn a fata de diye de nouì consé deun de doméne que lèi sayàn panco deun la réalitoù valdoténa de settanta an fé ou que l’an èi de gran tsandzemèn deun le déri-z-àn.

    Documàn pdf (435 KByte)

  • Santì

    Le-z-approfondissemèn leungueusteucco euntérechon lo vocabuléo llattoù i partie di coo, i maladì é i direndzemèn, a sen que l’è icriette si le bouite di medesin-e, i medeseun spéchaliste que no fa vére de tézentèn avouì eun approfondissemèn pe lo medeseun di di. Eun caro l'è dedià a la medesin-a populéra é i rabeuilleue.

    Documàn pdf (756 KByte)