(patoué de Tsaensoù)
La séchón « Dissèn é matériel didatteucco » s'eunretsèi euncó, avouì de nouì éizersicho d'icriteua, d'imadze é de carte didatteuque (FlashCards), pensaye pe féye cougnitre pi de mot i mèinoù é pe permettre de mioù aprende la lenva grase a l'assochachón vizuella.
Seu dezot vo trouade caque idoù pe eumpléyì le diffiente fiche :
1- eun le-z-euncollèn si eun papì ou si eun cayeue, pouon servì pe conté de conte ;
2- eun le coppèn é collèn si eun cartón, pouon itre eumpléyaye pe djouyì i carte ;
3- eun le-z-eumprimèn dou cou, pouon vin-e eun djouà di memory.
Euntre le noue bague n'at bièn cheue étó de conte, de pégne tsansón si le diffièn argumàn, que son llataye a trèi grou sujé : lo coo, la nateua é la via de tcheu le dzoo.
Si nouì matériel, que eunretseré la séchón « la via de tcheu le dzoo », l'a comme sujé l'icoula é lo ten que passe. Eun pi di lesseucco francoprovensal llattoù i matériel de l'icoula, vo trouade pi de dissèn que reprègnon le consigne é le riille queu eungn eumpléye la coutimma a l'icoula, mi étó lo vocabuléo di ten que passe é di calandrì (le dzoo de la senâ, le mèis, le sèizón é le-z-aoue).
Si matériel beutte eunsemblo difiente variante de francoprovensal é lo patoué que eungn eumplèye l'è marcoù si tsaque fiche. La caletoù di documàn permé a tsaqueun de tchandjì lo teste selón tsaque patoué (pe féye so, gnacade si l'imadze que vo trouade deun la séchón « Dissèn é matériel didatteucco » que spleuque commèn féye).
Pappa é mamma é eunségnàn pourrèn pèi trouì seu an rentse d'attivitoù amuzante, pe djouì avouì le mèinoù, rentse que no pourrèn étó eunretsì grase a vo conseille ! Oubliade pa que lo Guetset leungueusteucco l'è a voutra dispozechón, pe repondre a vo dimande de matériel « si mezeua ».