Queun demàn pe lo patouè ?

(patouè de Euntroù)

Malgré eun retor d'euntérè pe lo patouè é malgré le-z-éfor di-z-istituchòn é de bièn de dzi de boun-a volontó, la perte de vitalitó de heutta lenva semble eun fénomène que se pou po ni aplanté ni récupéré. Le mezeue prèize pe tchertché de fée coutsouza, mimo se efficase, baston po todzor pe rezoudre le problème a la rèise. Lo desteun di patouè l'è dedeun le man de hise que lo prèdzon : lo patouè l'arè an chanse de survivre canque can ll'arè de dzi que l'arèn voya de lo prèdjé é seurtoù de lo trasmettre d'an jénérachòn a l'otre.

Pèquè ho fuche pousiblo fou eunsisté avàn to su la fameuille, que l'è lo bri di patouè : se dedeun la fameuille ll'a pomì la trasmichòn de l'amour pe nouha lenva di queur, de l'orgueille de prèdjé patouè, de l'eumportanse de hi patrimouèno queulturel que l'è eun di pilastre de nouha sivilizachòn, adòn veun defesilo alé a récupéré hette mime valeur dedeun d'otre milieu. La fameuille, soutchan-uya di-z-istituchòn, pou gnan-ì lo poueun priviléjà de trasmichòn de la lenva, eun poueun a mimo d'apreusté lo térèn ioi fée crèihe l'amour di patouè. Eun conclujòn, fou prèdjé patouè, lo prèdjé euncó de pi, lo fée vivre eun lo prèdzèn.

L'è hllèa que an lenva vivanta l'è jamì ferta, l'è todzor eungn évoluchòn. Pe heutta rèizòn lo patouè pou po continué a reusté la lenva di campagnar, esprèchòn de la sociétó ruralla d'eun cou ; lo patouè dèi ihé i pose avouì le ten, dèi posèi repondre i nésessitó prateucque de la sosiétó di dzor de vouì. Mimo eun reustèn eun porteur de tradichòn, lo patouè l'è euntérèchà d'an trasformachòn é d'eungn'évoluchòn costanta pe posèi se mantchan-ì concuransiella avouì le lenve que pouon profité d'eun statù sosial pi eumpourtàn.

To ho l'è lo lo défì di-z-àn queeun !