Obert Evalde

(patouè de Veullanoua)

 

OBERT Evalde
Ayas 1912 - 1990

Mioù cougnù comme « lo méhtre Tatcha », Evalde Obert l'è nèisù a Antagnod l'an 1912. Bièn llétó a sa valoda, l'è reustó pe bièn de-z-àn l'animateur é lo diretteur de la tsantii de la parotse de Sen Marteun d'Ayas é di groupe de folclore local que se quérioo le « Tsoque ».

Aprì aì frécantó lo cheminéo de Veulla, l'è aló a Teeun pe choure le course de l'Ecoula Normala. Vin-ì mètre, l'a eunségnà a Saint-Jacques d'Ayas, a Vasavaentse, a Challand-Saint-Anselme é euncò a Periasc é a Antagnod, lo paì ioi l'è nèisù.

Apachoun-où d'istouére locala é osservateur de la via tradichonella, membro de l'Académie de Saint-Anselme, l'a traillà étò i-z-Archives Historiques Régionales deun le-z-àn que von di 1967 i 1974.

Sa produchón queulterella l'è reustéte regroupéte deun lo pitchoù livrè « Euna pegnà dè cointo forà », euvra dédiéte i bon patouè d'Ayas é coutsouza de pi qu'eun seumplo ézersicho littéréo. Eun lèi troue an reprézentachón réella de la via de tcheu le dzoo di-z-Ayasseun d'eun cou avouì leur personnadzo, leur llouà é leur viille-z-abetudde. L'écriteua bièn chouua é la retsertse d'an serten-a élégansa no repourte di passó de viille parolle é de viille costruchón grammaticale bièn adatéye i situachón décrite.

Méhtre deun diféèn doméne, Evalde Obert no-ze lèiche bièn de teste que fan comprendre son atenchón é son gran reuspé pe sa téra é son eun remarcoblo eunsemblo de conte plèizente.

Annexe