Lo Tsandzemèn

D'Elio Bertolin

(patoué de Dzonsàn)

Tic...Tic...Tic...le crep di martelet que boueuchon la fa si l'eunclleunna, lo tic tac reguillì de l'orlodzo que marque lo tén que passe, to comme deun eun vouéyadzo a requelón, ivron le pourte i couleue fanaye é i gou éigro-douse di souvin-ì.

A vo la poézì d'Elio Bertolin que éntre a feuye partia de la rèya di « poète de noutra téra » que tsanton leue péì, le bague seumple é la veuya de tcheu le dzô, l'armonì d'eun mondo rural que l'a quettoù la plase i tén moderno é donque i tsandzemén. Lo tsandzemén l'é fran lo titro de si oouvradzo, ioou l'oteue no prézénte eun itsanteillón de la veuya d'eun cou a Arnad, a traè de teste eun proza é eun poézì. Caqueun de sisse son itoù icreui de sa méye, que l'a si lèi transmettre la véin-a poéteucca.

L'organizachón di diffién sujé prèi eun considérachón, que no prézénte le momàn particuillì de tsaque sèizón, approtse seutta publicachón a eunna croneucca de sén que capeuite to lo lon de l'an é que se repète deun lo tén. La granta retsesse de si livro se troue deun lo chouà de la lénva, lo patoué, lénva di queue di Valdotén, que, mioou de totte le-z-atre, l'é a mimo de feuye chotre l'ama pi vrèya d'eunna communotì.

Eun si cas, l'é lo patoué d'Arnad que no fé sénteui totta sa muzeucca é to son esprì veuif é que bién fi onneue i-z-Arnayot : avouì leue fô attatsemén i tradichón, l'an seui lo mantiìn é lo transmettre i dzoueun-o.

E. Bertolin, Lo tsandzemèn, Ed. Cervino, Châtillon, 2009
Pri de vente : € 24,50