Fîta de la Val d'Ousta

30 août / 07 septembre 2010 - Aoste

La Fîta de la Val d'Ousta, a sa seunquima édichón, sit an l'è fitaye eun Veulla, dèi deleun 30 out tanque a demars 7 setembro. Lo programma de sisse dzor de fîta, organizaye pe la Prézidanse de la Réjón otonoma Val d'Ousta é pe l'Asséssorà réjonal de l'éducachón é de la queulteua, avouì la collaborachón de la Prézidanse di Conseil de la Vallé, de la quemeua de Veulla, di CELVA é de la Chambre Valdôtaine, avouì étó lo suppor de la Fondachón CRT, l'è bièn reutse. Comènche avouì lo Collège d'études fédéralistes, conteugne avouì le trèi dzor di Festival des peuples minoritaires, é la mezeucca de groupe que veugnon de diffiente réjón italienne é européenne caratérizaye pe de particularitoù leungueusteuque. Todzor deun la capitala valdoténa se réalizéré la VIIe Fête valdôtaine et internationale des patois, la groussa nouvelletoù de seutta fîta de la Val d'Ousta 2010, que propouzeré de table ronde, de-z-espozechón, de prézentachón de prodouì de la gastronomia, an messa eun patoué, de vezeutte guedaye é diffiente animachón, comme eun spetacllo téatral si l'eumpourtanta fegueura de l'abbé Jean-Baptiste Cerlogne, lo poète patouazàn.

Comme todzor, le-z-artiste di tsemeun, animon-pi euncó sit an lo santre de Veulla pe totta la feun de la senaa é propouzon-pi pe la nite de desandro 4 setembro, la Veillà des artistes.

Deleun 6 setembro plase Chanoux accueuille lo consert de Claudio Baglioni, é le sélébrachón fenèison-pi demars 7 i Téatro romén avouì la remiza, de la par di Présidàn de la Réjón, Augusto Rollandin, di mereutto Amis de la Vallée d'Aoste é Chevalier de l'Autonomie. Lo premì baille la sitoyenneté onoréra a de personalitoù italienne ou itrandjiye que, pe leur présanse ou pe leur achón, l'an contribouì a valorizé la Val d'Ousta. La seconda l'è baillaye a de sitoyèn, nèissì ou rézidàn eun Val d'Ousta, que se son disteungoù pe leur méreutto deun lo doméne di spor, de la queulteua, di sianse, di-z-ar, de l'économia, de la poleteucca ou de l'eungadzemèn sosial. La sérémounia fenèi-pi si lo note de « Montagnes Valdôtaines », l'inne officiel de la Val d'Ousta, eunterprétoù pe Maura Susanna. La chanteuza saré accompagnaye pe le muzisièn Andrea Dugros que, avouì lo Centre Musique Aoste, l'a réalizoù eunna inisiativa eun faveur di populachón di-z-Abruse que son itoù vitime di tremblemèn de téra. La nite di 7 setembro, la chanteuze Elisa féré son conser eun place Chanoux.

Pe eunformachón, liyade lo programme de la Fîta si lo site web www.regione.vda.it