Tsertsa

Dichonéo

Contenù di site

Multimédià

Teste eun patoué

Documàn

Proverbe é deut

Proverbe Ditòn patoué

(patouè de Tsaensoù)

Lo fameu filozofe italièn Benedetto Croce dijae que le proverbo son eun « monumèn di bon sans, la sajesse de tcheu le-z-éyadzo, la sajesse d'eun mondo que pe mouì de cou l'è itaye louyaye pe sa forse ». Le proverbo son, eungn effet, l'espréchón de la sajesse populére, ézalton le vicho é le vertù, baillon consèille pe la viya de la campagne, riillon le rappor sochal é baillon le riille de la morala quemeunna. Féon vère eun toc d'istouére de la mentalitoù de iaou veugnon foura la pouiye, l'espouer, le croyanse, le tradichón é l'esprì relijeu d'eun peuple, mi co la stretteua d'an sochétoù é son mécanismo. L'è eunna fourma de littérateua populéra ató de rèise bièn viille que nèi de l'osservachón de la nateua é de l'espériensa que se chou de jénérachón eun jénérachón.

La lenva di proverbo l'è poua é seumpla, é eumplèye le-z-eunstremèn de la poézia, comme la rima, pe èidjì a rappélé. Chouèn le proverbo son métaforeucco é pouon avèi doe eunterprétachón, eunna littérala é eunna fegueraye, totte doe profonde é souttile.

Pe sen que regarde lo contenù, eunna grousa partia di proverbo de noutra réjón prèdje di ten é so no iton-e pa se no pensèn que eun cou, d'eun llouà iaou se vequichae de la campagne, possèi preven-ì le sétchine é la mizée vouillae diye la diffiense euntre la via é la mor. Le proverbo que no proupozèn veugnon de diffièn poueun de la Val d'Ousta : caqueun l'è cougnì deun totta la réjón, d'atre euncó foua é se retrouon d'eun d'atre llouà de montagne ou belle pertot.

Son itaye eumpléyaye diffiente caletoù de patoué, pe moutré le diffiense de la lenva  a l'euntérieur de noutra réjón. La traduchón, pe levrì, l'è lo pi poussiblo lliziya i sans littérére, eun lèichèn i letteue l'eunterprétachón métaforeucca.

Annexe

Si site permè de vo mandér d'atre «cookies» (témouèn de connéchón). Se vo asétade l'utilizachón di «cookies» cliccade su OK, se vo vouléde pi d'eunformachón ou vo vouléde refezé, alléde a la padze di-z-eunformachón.

Padze d'eunformachón