Tsertsa

Dichonéo

Contenù di site

Multimédià

Teste eun patoué

Documàn

Pasó, prézàn é futur

« Le meulle coleur lengueusteuque é queulterelle de la Val d’Outa » de Alexis Bétemps

kaleidoscope-2186166-1920_5627_l.jpg

Memouée é identitó

(patoué di-z-Amaveulle)

Eun si momàn, ieui eun dit que l’umanitó cour ver an mondializachón totta égala, eun prèdze bramente de memouée é d’identitó. Si dérì mot pren chovèn de ton bièn déféèn a selón di-z-euntenchón de si que lo eumplèye. Sensa no pédre deun si janre de deusquechón, créyèn que l’identitó sièye to seumplamente eun santemèn, an fasón de lamé pi ou mouèn forta a selón di-z-eundevedù ou di groupe, gropéye i llouà é a leur istouére, a leur éretadzo queulterel, i relachón sochale euntre le dzi, a la formachón de tsaqueun. S’ajèi donque d’eun santemèn que se nerèi seurtoù de memouée. To lo lon de sa via eun sosiétó, l’eundevedù varde dedeun le riille, le valeur é le reprézentachón de sa comunitó, batèi lo seun sistéme de relachón é fé crèite lo seun santemèn identitéro. L’identitó l’è an retsesse qu’eun pou po ramplaché deun lo cadro di-z-équilibro sochal é garantèi étò la crèisua coéranta di comunitó. L’identitó valdoténa, comme d’atra par totte le-z-atre, l’è caratérizéye pe eungn eunsemblo de tré bièn marcó que nen fan eun patrimouéno uneucco, reutso é frajillo eun mimo ten.

Lenva é identitó

(patoué di-z-Amaveulle)

La lenva l’et, euntremì le tré identitéro, si qu’eun vèi de pi é co lo pi particuillié. Dèi gran ten, le Valdotèn prèdzon de riilla lo francoprovansal, lo patoué comme lèi diyon. S’ajèi di lateun populéro local, eunfluenchà pe le lenve prédjéye su plase, seltique é fenque mimo eundoeropéenne, eunretsì pe to sen que l’et arrevó di prédjé vezeun ou rendjamente pourtó pe de dzi nouvile. Le non baillà i llouà, fenque a sisse pi pégno, son tcheut eun francoprovansal; le mite, le conte, le crouayanse é le savèi (sen que ara no lèi diyèn patrimouéno eummatériel) son pasó d’an jénérachón a l’atra eun francoprovansal; eun francoprovansal noutre comunitó se son organizéye, l’an baatì leur eunstituchón é meiró de valeur partadjéye. Lenva i déféente fourme (tsaque parotse l’a di mouente an varianta a lleu), lo francoprovansal l’è jamì itó, dèi l’envión, eun prédjé solet é égal pertot. Pai, aprì l’abandón di lateun comme lenva ofichella, l’è lo fransé que l’a reumplacha-lo.

La crize d’eun modélo lengueusteucco

(patoué di-z-Amaveulle)

Deun lo 1861, an de l’Unitó  de l’Italie, l’italièn veun se djeunté de fasón ofichella i dave lenve tradichonelle. Le veunt an fachiste l’an eumpouzó de magnie brutala la lenva é la queulteua italiéna é, magrì le Statù d’Otonomia di 1948, la Val d’Outa recupère po to sen que l’ie son patrimouéno lengueusteucco tradichonel baatì su de siécllo de dépoù queulterel. Caze totte le-z-eunstituchón, laique ou relijeuze que sièyan, queutton a l’abandón lo fransé é l’écoula baste fran po pe lèi rendre sa fose ansestrala. La sosiétó campagnarda se per maamàn, sensa s’arété, é so eun pou lo vire bièn cller a l’envión di-z-àn 60, pai la montagne se dézolle, to comme l’agriqueulteua. L’économia tsandze pe queutté granta plase i tréjimo séteur, an nouvila ondó de imigrachón italiéna, la télévijón que arreuve deun tcheu le mitcho eun prégnèn la plase di véillà comunotére, to so beutte eun crize lo francoprovansal eun pourtèn de tsandzemèn que le dzi arreuvon po a contrebaré. Pai, eun di tré pi eumpourtàn, lo sistéme leungueusteucco, reusque d’itre éfachà a coueutte de la via de tcheu le dzor deun le veladzo. Mi po maque…

Le nouvile tendanse

(patoué di-z-Amaveulle)

Ver la feun di 20° siécllo, la tendanse a la globalizachón avanse, eun Val d’Outa comme pertot é le rapor identitéro dedeun la comunitó valdoténa tsandzon euncó. L’è l’envión de la périodda istoreucca que no vequisèn  ara ieui an matse de dzi se boudzon d’eun coutì a l’atro di mondo pe tsertché d’itre pi cheur, pe avèi an via méilleuiza, ieui le distanse s’éfachon caze de planta, avouì tot que s’aplatèi é veun égal selón de modélo bramente ret, avouì lo progré é l’eunvajón mascréye de tecneuque de controlo sochal. Le sosiétó tsandzon a coueutte pouchéye pe de bague nouvile que arreuvon sebeutte sensa respet pe lo pasó. Fodrie savèi le megnadjé de catche fasón perqué leur mordèn reusque de tot aplatì, de rendre tot égal, eun pocca paolle, d’éfaché l’istouére,  seurtoù salla di populachón pi fèible, salle que son itéye le tsévrón de la sivilizachón mondiala. S’eungnoue de vire lo désèn d’an noua vuya queulterella, eun désèn que l’a panco de contor cller. Deun seutta nouvila situachón, l’eunsemblo di cougnisanse é di valeur développéye pe la sosiétó campagnarda tradichonella sebrolle, to comme sebrollon le lenve é la queulteua que semblaon pitoù solidde eun Val d’Outa, fenque garantie pe an lloué costituchonella. De tracas nouvì traverson la sosiétó, trepéléye de dou coutì : s’ivrì eunver le-z-atre ou se clloure su sé mima. L’è lo momàn de véillé é de travaillé perqué l’aviìn sièye reutso, chanjàn é respétueu di retsesse queulterelle recouilléye deun lo ten. Sensa eungadzemèn, sensa de-z-achón spésefeuque, le nouvile tendanse pouon étofé la memouée é fiye de dégà moustre.

Vardé la memouée

(patoué di-z-Amaveulle)

Fo tsertché eun nouo équilibro, eunretsì pe de nouvi-z-appor é pe l’éretadzo di vioù. De bilavàn, vardé lo patrimouéno di cougnisanse ansestrale l’è todzor pi problémateucco perqué le savèi pason pamì pe le tsemeun tradichonel é le moyèn de comunicachón de voueu lo dzor lèi baillon pamì fèi. Fenque leur memouée reusque d’itre éfachéye. L’è donque eumportàn que l’éretadzo di pasó sièye étedjà pe itre mioù cougnù, vardó é djeustamente moutró perqué pouèye itre euncó eungn élémàn indentitéro a dispozechón di jénérachón de demàn. S’ajèi po de lo eumpouzé, mi de lo vardé perqué le dzoveun-o sitoyèn cherdèyan leur aviìn eun cougnisèn senque l’et. To sen que l’è produchón de l’esprì é de la sensibilitó uména dèi terié noutra atenchón, seurtoù can seutta fourma de sivilizachón l’et uneucca é acapiteré jamì pi. Fo étò la protédjé se n’a fata. L’et eungn’éizijanse a caratéo jénéral é no pourian fenque diye universel. La fata d’an contenuitó queulterella, meachéye voueu lo dzor pe lo mouvemàn global de standardizachón, l’è repandua é partadjéye. Vardé la memouée é tsertché l’identitó l’è todzor de pi néseséo, prise, é le comunitó dèyon troué de soluchón.

Sen que eungn a créù de fiye amoddo

(patoué di-z-Amaveulle)

La Val d’Outa, pe mézo de l’Aministrachón Réjonala prévoyanta, l’a pensó, dèi de-z-àn, de se baillé de-z-estremèn convegnablo eun soutegnèn le-z-assochachón è eungn organizèn eun buró esprés : lo BREL (Buró Réjonal pe l’Etnolojie é la Lengueusteucca). L’at euncó soutiìn la néisanse de streteue que recouillon tot a sor de matériel ( eunrejistremèn sonore, lettre, cair de tsansón, papì écrì, fotografie, vidéó…), lo beutton deun le-z-archive, lo classefion é lo vardon, lo éteudzon é lo fan cougnitre. Eun mimo ten, l’Aministrachón l’at étò developpó eungn’achón constanta pe euncoadjé le dzi a prédjé lo pi pousiblo le lenve tradechonelle : lo fransé a travì l’écoulla, l’organizachón de momàn queulterel, la diffujón de livro, de film…; pe sen que regarde lo francoprovansal, l’et entró a l’écoulla dèi pouza avouì lo Concour Cerlogne; l’è moutró a l’Ecoulla populéra de Patoué nèisua esprés; l’et eumpléyà deun le pise de téatro, écritte é eunterprétéye pe an matse de compagnì nèisue deun la seconda mèitchà di XX° siécllo; l’et écrì pe le poète é le-z-écrivèn; l’è tsantó pe le queur é le tsanteur. Eun pi, l’Aministrachón l’at euncó fé nétre la proféchón de métre de patoué eun recougnisèn a eun mouì de dzi de compétanse sertifiéye. L’è véé que n’a fata que lo souvenir se vardèye, mi l’è euncó pi eumportàn que sen que l’et eun via allèye eun devàn su lo tsemeun de l’istouére é pouèye baillé jouése a tcheu sisse que pourton seutta lenva deun lo queur eun nerissèn, i mimo ten, la diversitó lengueusteucca é queulterella.