La dénominachón offichella di quemeue de la réjón l'è itaye itablia pe l'articllo 1 de la lloué réjonala n. 61 di 9 de désambre 1976 (dénominachón offichella di quemeue de la Val d'Ousta é protéchón di non di llouà local).
Le dénominachón son totte eun fransé, mouèn que salla de Veulla : eungn eumplèye i mimo ten salla italienna « Aosta » é salla franséze « Aoste ».
Eun prononse sertèn non de llouà eun pégno so diffientamente pe rappoo i riille de la fonéteucca franséze é prègnon le marque di fransé réjonal, propro de la Val d'Ousta.
L'è lo cas pe ézeumplo di « z » final de Bionaz é de Perloz que, deun la tradichón valdoténa, l'è euna marca grafeucca eumpléyaye pe féye savèi que l'assàn toneucco tchi si l'avàn déria sillaba (i contréo de sen que capitte pe lo fransé iaou totte le paolle son de-z-ossitón) : donque fa pa lo diye.
Eun pi é i contréo de sen que capitte deun le riille di fransé, eun prononse la demi-voyella « y » é la consonne « s » maque deun sisse cas :
- Antey-Saint-André, Aymavilles, Gressoney-la-Trinité, Gressoney-Saint-Jean é Pontey ;
- Ayas, Donnas, Fénis, Nus é Verrès (étó eun fransé chouèn» eun prononse, lo « s » di non propre que fenèison pe « -ès » : pe ex. Agnès, Alès).
La coutimma, le Valdotèn prononson lo son « e » pe lo non de llouà Doues, que eun fransé sarie meut é donque prononchà « Dou ».
Le riille de grafia di non de llouà eun patoué, eun titsch é eun töitschu son itaye approuaye avouì la délibérachón de la Jeunte réjonala n. 828 di 20 avrì 2012 é n. 898 di 24 mi 2013. Seu eun baille can mimo de-z-ézeumplo deun la fasón de prononchì non de llouà valdotèn.
Acoutade la prononsa de tsaque quemeua de la Val d'Ousta eun ditchardzèn le fiché sonore seu dézot :