(patoué dé Bretsón)
O patoué ou sé ferma pa !
Belle sé a sitouatsion sanitéra a l’émpoza dé grouse limitte, co tseht’an, o buró dou BREL dé Assessorà réjonal di Bén queulterel, dou tourisme, dou sport é dou comerse ou l’a propozà i quemeunne da réjón dé organizé le cours dé patoué pé adulte, ténì pé le méhtre dé l’Ehcola populére dé patoué.
L’adézión a l’at ichtà grousa : i l’an ichtà beuttà én pi 22 cours pé énvioné a aprénde o patoué én 18 quemeunne valdouchtane, pé un total dé 364 ehcreut.
Le cours i sé tenneràn touit én légna é l’éntérativité di létsión a sarat garantià.
Comme l’acohtuma, dacohte i conténù dé lénga, i saràn prézentà d’aprofondichemèn so a queulteurra valdouchtana.
Én pieuch di cours dé lénga, tseht’an y é eunna novéta: o premì mini-cours dé grafia “pé tchatté én patoué”, tsinc létsión pratécque pé aprénde le prensippe dé baze da grafia dou patoué. Le conténù di létsión i saràn dichponébio vents le padje dou sito da sétsión Aprénde.