Tsertsa

Dichonéo

Contenù di site

Multimédià

Teste eun patoué

Documàn

Concours Cerlogne 2020

11 mai 2020

In parcour dé animachón lenguesteucca... in parcour quità a miquià

(patoué dé Arnà)

Lé minà di hcole atèndivon la fén dou mis dé mai touit contèn. Oi, cheur perqué hénéque voulive deue qué sivon caze a la fén dé l'an dé hcola, ma co pé ign'atra baga : lo Concours Cerlogne. 

Lé minà, lé méhtre lé métresse travayavon so hi projé tot lo lon dé l'an. Sé envion-ave lo travai, avó dé témouèn, en mandèn i paèn i mitte, i pagró, i magrose, en fièn dé pormon-à so lo territouéo, en ehcrièn dé djouà é dé dizègn, dé tsanhón, dé poézì, é bièn d'atro. Sé fiavon co dé grose retsertse é aprestavon in piquiot projé qué poué vignave mandà ou BREL pé éhtre dzedzà. 

Ent'i hcole, comme touit lé an, lé minà atendivon lé animator qué ent'in parcour dé 8 oue, iéèyon prèzentà lo lor projè dé animachón. Cahquieun dé hize projé y avivon envion-à, d'atre finì, d'atre sivon a miquià. Paé lo BREL y at pensà bén dé beté a dispozichón di métresse, di minà, di paèn, dé la dzen lo projé dé oyèn: Prosper, lo trator vert. 

Lé animator y an herdì dé travaì surtoù so lo cortì, so la véya qué néh lai é so lé mobio qué sé empièyon pé travaì la tèra é vardé lo cortì é la campagne. En compagnì dé Prosper, hitta bé trator, sé poudréat fae in bé voyadzo ou mentèn dé la nateua é di sén mervèye.

So lo nouhtro sito dedeun la séchón Concours Cerlogne 2020, trouvéédde tot lo matérial qué lé animator y an aprestà : vidéó, djouà, idé pé dé travai a fae i mitte. 

Vi qué oyèn la féhta sé poudréat pa fae, vo mandèn co dé aviquì avó no lé vidéó di viéye édichón dI féhte dou Concours Cerlogne.

Boun-a vijón !