(patouè d'Euntroù)
La plan-èta que donte hi seugno l'è Mars, l'élémèn l'è lo fouà.
Lo Solèi passe deun hi seugno euntre lo 20 de mars é lo 20 d'avrì.
Couleur : lo rodzo deun totte se nuanse.
Pira de la chanse : lo coral rodzo.
Métal : lo fia.
Dzor de la chanse : lo demase.
Caratéo
L'è eun seugno de grousa créativitó. Lo Moutòn l'a fota d'ajì é d'organizé, l'è orijinel é refuze d'ihé organizó pe d'otre. Pou ihé égoiste, courajeu é lest a apprende.
L'ame dirijé eunna situachòn defesilla é l'a de boun-e inisiative, mimo se po todzor porte a terme se projè. L'a fota d'aì to di lon de nouì objétif é de nouile-z-idó.
L'è an dzenta combinachòn : pou ihé sensa magnii mimo se se neun ren po contcho.
Belle se demouhe d'ihé courajeu, heutta fasòn de se pouzé de cou l'è moque eunna mascra perquè pou trambellé d'eun moumàn a l'otro. Lo Moutòn la coheumma l'a boun-a santì, mi, feunque se l'è rando d'énerjie, cren tchica se-z-entouziasme é se-z-essé.
Lo Moutòn l'a todzor de lemie ados, l'è for, brivo canque a la feun, crèi deun se-z-idó é l'è sensa doute naturel. De tenzentèn l'arruye i poueun de rontre sertèn rappor, sensa mezaté su le consécanse de se-z-achòn é de se parolle.
Mimo se s'aplante po tan desù le bague é l'a po de fermetó, l'è todzor eun tren de fée coutsouza, caze i poueun de se lagné pe to hi traaille, pe tcheu hise projè é pe la frustrachòn can l'arruye po a otchan-ì henque l'ourè.
Lo Moutòn l'a deun llu eunna fouse mistèrieuza : tsi é tourne tsire mi tourne todzor se sopendre dret é tourne baillé lo tor.
Lo caratéo di Moutòn pou feunque ihé violàn é brutal, mi la coheumma l'è onnèto é l'è po bon de vardé lo mouro. L'è pocca diplomateucco : de la bihe que caratérize son seumbole, l'a prèi l'abitudde d'attaqué l'ostaclle mouro contre mouro.
L'ame po le fierle mi, se lèi fou fran nen conté eunna, so lo fée amoddo. L'a po de djemì mezeue, can s'ajì de sou so ihé bièn jénéreu mi bièn acrapì étò.
Lo Moutòn l'è orgueilleu : l'ou ihé lo meilloi, po tan pe lo rézultà final mi fran pe lo gou de l'achòn eun sè mima.
Deun l'amour lo Moutòn pou ihé fidèle, mi se lagne di rappor modeste que pe llu veugnon frajillo. L'amour pi eumpourtàn pe lo Moutòn l'è la libertó.
Son eunfanse l'è soèn defesilla mi deun le-z-étude, se l'a voya, l'a de boun-e capasitó. Pe crèihe l'a fota de riille é d'attenchón, accompagnéye d'eun for amour é d'eunna afféchòn que durèye deun lo ten.