Lo fé que la Val d'Outa l'è itaye deun l'istouére an téra de passadzo no eumpatse de itablì queunse tsansón son fran de no. Eungn éffé, bièn d'élémàn queulterel son queumeun a sisse de noutro vezeun souà pe la prézanse di col que l'an todzor permettì le-z-itsandzo avouì le dzi de l'atro coutì di-z-Alpe, souà pe lo fé mimo de féye partia de l'ére francofone. L'é fran dimoutroù que, esséchón féta pe le produchón pi ou mouèn résante di compoziteue valdotèn (é deun si cas no pouèn fran prèdjì de mezeucca valdoténa), le mélodì que veugnon son-aye eun Val d'Outa eun le-z-accappe étó eun tchi noutro vezeun (Franse, Chouisse, Canavèis). Maque lo faux-bourdon, tsantoù pe le tsantiye, a l'eillize, l'é eungn ézeumplo d'espréchón muzicala de la Val d'Outa que troue pa an lardze diffejón eun tchi le péì protso de no.
