Lo boh dé tsahtagnì entsì no

Co bièn dé mobio hé entsì no sivon fét to dé boh dé tsahtagnì.

Surtoù lé artse é lé artsón qué servivon pé vardé lo bià, lo fromèn, la méya é lé tsahtagne biantse.

Empiéyavon co lo boh dé tsahtagnì pé fae dé tabie, dé caèye, d'ehtsagn, dé artsébàn, dé crédenhe é dé placar.

La porta dé la crota y ive caze toujour féte to lo boh dé tsahtagnì qué teun dé pieu a l'oumiddo é paé poréh pa vitto.

La porta di crote y ive caze toujour na porta dobbia.

Lo déré dé la porta y ive fét to dé tavé dret é lo davàn to lé tavé dé travé, tugnà ensembio to dé tatse é, apré, co to dé vih.

La porta dé l'ehtabio y avive dé tavé dret déré é so lo davàn y avive tré traverse, toujour tugnà ensembio to dé tatse ou dé vih.

Co lé porte é lé fan-ihtre sivon féte to dé boh dé herla. La herla y et pieu bella comme vén-a é lo boh y et pieu deur qué l'ento. Résavon lé tavé é lé lichiavon foua bagnì en pocca pé fae alé vià lo tanén. Apré lé entehtchiavon ou payì ioù qué fiyavon la téhtse dou fen. Apré tré, cattr'an  sivon sec pé porté i minijé pé fae lé porte é lé fan-ihtre.

Bièn dé mandzo di mobio sivon fét to dé boh dé tsahtagnì :

lo mandzo dé la tren,

lo mandzo dou cournì,

lo mandzo dou péc,

lo mandzo dé la pala pian-a,

lo mandzo dou péc dou boh,

lo mandzo dé la mahe,

lo mandzo dé la mahetta

é lo mandzo dou marté.