(patouè de Vagrezentse)
La planéta que donte si signe l'é lo Solèi, l'élémèn l'é lo fouà.
Lo Solèi passe deun si signe euntre lo 23 de juillet é lo 22 d'out.
Couleur : lo dzano or.
Péra de la chanse : l'or.
Métal : lo diamàn.
Dzor de la chanse : la demendze.
Caratéro
Lo Lión l'é lo signe dou pouvouèe. L'a de volontéi é de déterminachón, condzeblée a bramèn de grase. Si signe l'a eun ego bièn prononchà que lo porte a isséi lo pi eungamba deun queunta situachón se voille. Le nèisù dézó si signe baillon eun sans de confianse é pouon se demoouséi de bon tsachoou deun l'amour. Senton l'ézijanse de comandéi méi l'amon pa gagnéi le partie tro seumple perqué lèi troouvon pa de gou. San queun l'é leur valeur é l'amon isséi apprésià : so le ren gnaque fase i complimèn. Son euntéréchà a tan de bague deferente, l'an eun bon esprì d'organizachón méi lèichon i-z-atre le travaille mouèn eumportàn.
Vu que lo Lión governe lo queur, le nèisù dézó si signe can viéillisson son sedzet a de probléme de queur. Pouon s'oubliéi que avouì lo ten lo cor ten a s'affèiblì é so féi poyéi la préchón dou san. Lo Lión l'é orgueilleu, courajeu é gneucco. L'é eun chef pe nateura méi pa todzor deun la réalitéi.
L'a todzor deun llu la prezonchón, la fata de bailléi de-z-odre i-z-atre, que eun bió mouéi de coou, se l'é pa bièn jèrée, féi fran rie le polet.
L'é an personna ambechoouza, otoritéra, pléye de via, fiéra comme eun pet, fidéle é de bon queur. Son de tsoouze llattée a la via de tcheu le dzor é son totte caratérizée de la méima baga : la volontéi. Se lo Lión la eumplèye mal, seutta volontéi pou portéi a bondàn de pachón, d'orgueuille, a isséi acrapì, a volèi gagnéi a tcheu pri, a prendre le bague bondàn su lo sèrieu, fenque a resitéi deun la via. Sen que ébaì l'é l'estraordinéra confianse eun sé méimo que lo Lión l'aré todzor.
L'a gneura considérachón de l'euntenchón di-z-atre : l'é adón que l'otoritéi se modifie deun la sèi de pouvouèe, que lo porte a volèi s'eumpoouzéi eun tot é pertot. Isséi de bon queur l'é eunna de se pi considérable caletéi.
Son esprì combattèn se moouse deun dave fasón : d'eunna magnéye pi uména (tandanse a combattre sa nateura) é d'eunna magnéye suruména (la vitouére su le prooue, l'espanchón de l'ego pe lo bienétre de tcheut). Lo Lión l'é étó lo signe de l'éducachón, di mèinà, de la glouére é de l'ar.