(patouè de Dzonsàn)
L'é pa évidàn de reprézéntì, a travè de-z-imadze, eun bién immatériel, comme la lénva que prèdze an communitoù, mimo se n'a de-z-élemén é de maleuise que no permetton de bién no-z-approtchì é arriì a no-z-eunténchón.
La convénchón de l'UNESCO seui la sovegarde di patrimouane queulterel immatériel contemple, avouì a sise bién que Alberto Cirese l'a défin-ì « voladzo », d'atre aspé que idzon a réndre pi souleuido si sans, di-z-objé assochà i-z-espase queulterel. L'é lo cas, pe ézeumplo, d'an squeulteua ou bién d'eun bocón d'artizanà que l'é l'esprechón d'an capasitoù que se transmé de jénérachón eun jénérachón, di-z-arbeillemén é de la chénografia de suppoo a l'attivitoù téatrale, di vezadzo di dzi dépozitére d'eun vioù saèi é de sise pi dzoueun-o que avouì iton-emén veugnon de lo découvreui.
Avouì seutte eunténchón, l'espozechón Le llouà di patoué s'eunsérèi deun le-z-achón de valorizachón de la lénva di queue di Valdotén, pénséye a l'euntérieue de la 7a Fita valdoténa é eunternachonala di patoué, inisiateuiva que l'Asséssorà de l'éducachón é de la queulteua de la Réjón otonoma de la Val d'Ousta organeuize pe l'an 2010.
Eun partén de so, l'é nèisseuya la volontoù de créì eun parcour pe dicouvrì salle situachón ioou lo patoué rechor, choué é se pou caze totchì é salle attivitoù que d'avouì lo patoué se séparon jamì, comme lo téatro eun patoué, la sivilizachón valdoténa deun le-z-icooule, le djouà de noutra téra, l'artizanà de tradechón, le-z-inisiateuive pe lo feuye cougnitre. La consianse de l'eumpourtanse de la lénva rechor dèisén comme eungn aspé bién prézén eun Val d'Ousta, la seulla réjón ioou lo francoprovénsal teun é conteneuye a s'évoleì.
Deun eun climà de nouì euntéré pe noutro patoué, que l'a pourtoù eunna forta attenchón seui lo sujé, mi, i mimo tén, deun eun momàn delecat é considérablo pe son avin-ì, l'Asséssorà de l'éducachón é de la queulteua l'a eun role santral de eunna eumportanse primére, eun pritén attenchón i-z-ézijanse de la populachón, eun proupouzén de-z-attivitoù, eun réalizén de publicachón ou de prodouì multimédial, eungn acheén son soutìin i-z-assochachón que traaillon pe le mimo objectif.
Euntre le-z-événemén, le conte de veuya, lo traaille é le momàn queulterel que trasmetton lo patoué deun lo tén, lo Concours Cerlogne é le Dzornoù de la sivilizachón, l'Icooula Populéra de Patoué, lo Festival di peuple minoritére, la publicachón di premì volumo d'an colléchón d'audio-livro pe mèinoù, di Dichonnéro di petsou patoésan, lo premì dichonéro eun trèi lénve pe le pi petchoù é de la revua sémestrella La voix des peuples minoritaires son caqueun di poueun foo de la pouleteucca queulterella de l'Asséssorà pe la promochón é la diffejón di francoprovénsal valdotén.
L'é nésesséo que lo patoué sise pa maque llézeui a eunna cllasse ou a eunna maniféstachón, mi fa que sièye eumpléyà deun totte le-z-occajón é deun tcheut le conteste é churtoù fa que sièye tramandoù é prédjà deun la fameuille, que reste la preunsipala garanseuya pe sa conservachón. L'é pe so que l'Asséssorà l'a fortemén vouleui la sélébrachón de la messa eun patoué é pe seutta rèizón s'é euntchardjate de la feuye tradoueuye.
Deun la réalitoù de la Val d'Ousta de voueu, que approtse an pluralitoù de queulteue é de peuple, son todzoo pi nombreuze le dzi que voulon aprénde lo patoué, ou can mimo s'aprotchì a seutta lénva é avouì de rèizón diffiénte que van de la retsertse de leue rèise, a eungn'euntégrachón méilloouza, a l'euntéré personnel é queulterel.
A paa le poueun foo de la lénva di queue di Valdotén é le situachón priviléjéye pe sa trasmechón, lo futur di patoué déi passì euncó a travè seutta catégoria de nouo patouazàn que l'é eun tren de se fourmì é de prénde eunna fizionomì difiénta.
L'espozechón donque l'a eun doblo sans : d'eun coutì l'oou cougnitre é diffujì le valeue d'idantitoù de noutra communitoù é de l'atra, eun fién eungn'analeuize réella de seutta sosiétoù, l'oou fichì lo regaa ver l'avin-ì perqué lo patoué sièye pa sinonimo de cllozeuya, mi d'iverteua queulterella é de valeue capitala pe le Valdotén.