(patoué dé Votornéntse)
Apré lo Projè Popón, i continue la collaborachón éntre l'Assessorà éducachón é queulteua é l'artiste Francesco Tullio Altan, avoué dovve nouvve peblécachón - én-a pé lé minó di maternéle é én-a pé si di-z-élémantére - qué i aprotson la tradechón valdoténa i-z-ézijanse dé l'énségnemèn, én tsertsèn dé émpléyé lo francoprovansal comèn lénga d'éntégrachón é dé lo prézéntà comèn én-a retsesse dé quieutte.
Lé peblécachón son itoye aprestoye pé lo projé dé l'énségnemèn facultatif dou francoprovansal dédén lé-z-écoule valdoténe, é i son én mouèblo utilo i minó pé aprenne la lénga.
La conta dou ra y é én-a conta féte avoué dé répétichón, én-a dé selle qué lé mammagràn y an contó pé dé siècle i nevoù, é i fé par dé la tradechón valdoténa, ma on la rétrouve co én d'otre veladzo alpén.
Y é itó désidó dé po émprimà lo teste dusù lé padze dou lévro, pé po émpezà én-a variante particuliée dé francoprovansal, ma pé lésé qué tsaquie minó i posisse la tsertsé dédén chón patoué.
Dédén la séchón Apprende on pou détsardzé lé teste dé la conta - én la verchón éntée ou rédouita - dédén totte lé variante dé francoprovansal.
Dédén lé lévro on trouve co dé-z-ézersicho, qué i son itó étuguì pé lé déféèn éyadzo di minó, é la traduchón dé la conta én fransé é italièn.