Tsertsa

Dichonéo

Contenù di site

Multimédià

Teste eun patoué

Documàn

Festival di peuple minoritéro

(patouè de Euntroù)

L'istouare di peuple minoritéo l'è po mocque fétte de leur bataille pe l'idantitó, u de la retsertse di garansiye nésesée a leur surviya. Pe tsicque peuple dèyon lèi ihé étò de-z-occajòn de rancontre, d'étsandzo, de réflèchòn, de dialogue é de convivialitó. É pèquè ho hé fuche pousiblo fou organizé de randévoù, le-z-apreusté é nen prèdjé avouì tcheutte pe convencre le dzi, de magnî que lo projè pourtuche se frouì.
De heutte considérachòn pren viya eun Valoda d'Ouha lo Festival des peuples minoritaires.
Lo mo « festival » va gnan-ì eun devàn de rancontre d'artiste, vin-ì prezenté leur traille i pebleucco. Pai, pe tri dzor, vo-ze propozèn eun volet cinéma que prézente de filmà que no-ze fon cougnihe la viya de coutcheun-e de nouhe comunitó, avouì leur particularitó, leur problème, leur ambichòn é leur réalizachòn. Eungn otro volet di Festival l'è dedià a la mezeucca.
A coutì de hise moumàn de peur boneur artisteucco, n'en rezervó an plahe i discuchòn que no pouèriòn définì « poleteucque » : lo premì dzor l'è dedià i problème di-z-identitó dedeun l'Oroppa dedeun laquella no lamériòn vivre ; lo secòn dzor a l'eumpourtanse di difin-ihe queulterelle dedeun la globalizachòn; é lo trijimo de l'élaborachòn de stratéjiye partadjéye, eun fonchòn de la promochòn poleteucca é queulterella di comunitó minoritère.
Tan de dzourné que s'anonchon bièn tchardjéye mi variéye é que, no spérèn, permettérèn a tsicque partesipàn de repartì avouì hen que l'è gnan-ì tchertché : de nouve cougnisanse é l'esprì pi déterminó, pe mioù fé fron i problème de son peuple.

Festival di Peuple minoritéro 2011

(patouè de Veullanoua)

De dedzoù 8 canque a desandro 10 sétembre 2011, lèi sarè eun Veulla la trijima édichón di Festival di Peuple minoritéro que se prézente avouì l'entuziasme é la voya de condivijón que lo eunflamón dèi que l'è nèisù.
Euncò hit an lo programme l'è bièn jénéreu : lo Festival, que se prézente souà comme muzical que de refléchón, l'arè comme eunvitó la Sardègne, la Galice é lo Québec, plachà eun Veulla deun le difièn espase prévù.
Euntrì le moumàn pi eumpourtàn de la manifestachón, le conser organizó deun la dzenta cornise di Téatre romèn de Veulla, que prévèyon coutcheun di pi eumpourtàn eunterprète de la mezeucca populéra. Da la Sardègne aruérèn le Tazenda, cougnù pe leur particuillì ritme rock etneucco ; da la Galice, Carlos Nuñez, cougnù deun to lo mondo pe sa eunterprétachón eun cllo moderna de la mezeucca populéra galisienna. Pe fenì, di Québec, lèi sarè lo groupe Bottine souriante, euntrì le pi empourtàn reprézentàn de la Mezeucca di Mondo. A resèivre, deun heutte souaré, heutte dzi vin-e da foua sarèn de-z-artiste local comme Maura Susanna é Luis de Jyaryot.
Le dzournó di Festival prévèyon étò de moumàn pe le-z-animachón i santre de Veulla avouì lo groupe de la galise Banda de Gaitas Xarabal.
Pe hen que regarde le moumàn de aprofondissemàn, le dzournó di Collège d'études fédéralistes, organizéte pe l'Assessorà de l'eunstruchón é de la queulteua de la Réjón otonomma Val d'Ousta, eun collaborachón avouì la Fondachón Émile Chanoux, sarèn eungn'occajón pe fée de refléchón su le minoranse leungueusteuque é su lo role que l'an deun la sosiétó di dzor de vouì.

Annexe

Archive programe Festival des Peuples minoritaires