(patouè de Gressàn)
Eunna di baye pi complequéye é i mimo tén pi euntéressante di tsansón populére, eun jénéral, é di berseuze, eun partiqueillì, l'é llatoù i fé que le tsansón son restéye vivante, deun eun gran nombro de ca, mersì a la tradechón orala. L'a, pe seutta rèizón, de caratéo partiqueillì di queulteue a trasmechón orala, comme la predispozechón a eumpléyì lo "botse-i-bouigno".
La berseuza l'è comme la queulteua de iaou veun, é fé vére de baye gropéye a la mitolojì, l'istouére, le léjande mi euncò an canquitoù de problème psicolojique, di personne é de la sosiétoù.
Eumpléyéye pe fiye eundrimì le pégno popón, la berseuza l'a le rèise deun lo conteste sosial de la quemeun-etoù de campagne é de la fameuille patriarcala, iaou l'é caze totta djestiya di femalle de tcheu le-z-éyadzo : le berseuze son pa tsantéye renque di mamme, mi euncò de totte le fenne de la fameuille, le gran-mée, le seaou pi viille, le tante que pouon le ramplachì deun si devouê.