Tsertsa

Dichonéo

Contenù di site

Multimédià

Teste eun patoué

Documàn

Abbé Cerlogne Jean-Baptiste

(patouè de Veullanoua)

CERLOGNE Jean-Baptiste
Sen-Nicolà 1826 - 1910

Jean-Baptiste Cerlogne l'eu nèisù a Saint-Nicolas, deun lo veladzo de Cerlogne, lo 6 mars 1826. L'a frecantà l'ecoulla dou veladzo tchérua de son péye Jean-Michel é, canque a l'adzo de onj'an, l'a vardà de tchévre. L'an 1837, par pe Marseille ioou travaille comme ramoneur é garsón de quezeura.


LO QUEZERÉI-POÈTE

L'an 1845, torne a Saint-Nicolas méi lèi fa to de suitte tornéi partì comme soldà pe la premiéye guère d'eundependanse.
En guère se féi remarquéi pe se caletà que lo porton a resèivre dave menchón d'onneur. Tornà eun Veulla euncomenche a travailléi, l'an 1851, comme quezeréi ou Gran séminéro ioou lèi baillon lo non de « quezeréi-poète », a coza de son abitudde a compozéi de rime.
L'eu fran ou Gran séminéro que euncontre, l'an 1855, lo tsanouéno Bérard, l'ommo que decouvre deun lo quezeréi l'étoffa dou poète.
Cerlogne l'eu euncourajà dou relijieu a icrie se poézie eun patoué é l'an 1859, a l'adzo de 33 an, iàn séminariste.


LO PRÉYE

L'an 1864, Cerlogne di sa premiéye messa deun la petchoouda eilléize de Saint-Nicolas, son péì d'orijine.
L'an 1865, l'eu mandà comme viquére eun Vagrezentse é, l'an 1866, a Pontboset ; deun seutta queméya otchèn la médaille ou mereutto sivil eun recougnissanse di chouèn eunver se parouassièn deun la pèriodda d'épidémie de coléra.
Cerlogne iàn, eun 1870, curéi de Tsandeprà, é deun seutta parotse euncomenche a se dédiéi étó a la viticulture.
L'an 1879 s'euntchardje de la Rectorie de Saint-Jacques d'Ayas é apreste to lo matériel pe son dichonéro é sa grammére eun patoué.
L'an 1889, l'eu recteur a La Trina de Gressoney. Todzor chouù de sa viéille serventa, de son tsat è de sa machinna a eumpriméi, Cerlogne pren la plase d'omognéi deun diferente parotse dou Piémont. L'an 1901, l'eu recteur a Vieyes, veladzo euntre le-z-Amaveulle é Cogne.
La dèréye étappa dou lon voyadzo de sa via de préye s'aplante ou Priorà de Saint-Pierre.

LO « FÉLIBRE VALDOTÈN »

Cerlogne l'a fa de sa lenva maternella eunna soursa d'eunspirachón é l'eu fran su lo patoué que l'a bâtì totta sa produchón poéteucca. La poézie de Cerlogne néi é pren forma di plase pi cougnue é protso a l'oteur, de son cadro de via de tcheu le dzor, ou mentèn di-z-élémèn de la tradechón que se perpétue deun lo ten, di couleur é di parfeun de son ézistanse.
Se poézie son lo mèrioou de son ama, de sa terra d'orijine é de se compatriote, de sa Val d'Ousta. Cerlogne s'è jamé considérà eun dialectologue ou eun leunguiste, se sentché pi seumplamente eun « amoureu dou patoué ».
L'an 1893 publie « La petite grammaire du dialecte valdôtain » é, l'an 1907, lo « Dictionnaire du patois valdôtain ». Lo but de seutte publicachón l'eu si léi de bailléi i Valdotèn eun eunstremèn pe s'espriméi deun leur « lenva dou queur ».

CERLOGNE É LE-Z-ATRE

L'abbé Cerlogne l'ie eun contat avouì de nombreuze personalitéi, pa maque valdoténe é italienne, méi feunque eunternachonale. La correspondanse retroouvée que lo témouagne va dou 1867 ou 1910.
No menchorèn l'abbé Rousselot, fonétisièn é dialectologue fransé, Paul Marieton, prézidàn de la « Société des Félibres de Paris », Paul Meyer, filologue directeur de « l'École des Chartes de Paris », le-z-écrivèn Louis Zuccaro é Cesare Pomba, le professeur Joseph Cassano é Leone Luzzatto, lo leunguiste é dialectologue Carlo Salvioni, l'abbé Henry...
Cerlogne l'a euntretchérù eunna remarcabla correspondanse avouì la Mèizón Rouayala é avouì lo comte Costantino Nigra.

LO « TSAN DOU SIGNE »

Cerlogne passe le dèréi dzor de sa via a Saint-Nicolas, dézó le souèn dou curéi Émile Bionaz.
Lo 4 ottobre 1910, a 5 ooue dou mateun, l'abbé Jean-Baptiste Cerlogne mouer deun sa tsambra de la cura de Saint-Nicolas.
L'an 1914, la populachón de Saint-Nicolas inaougure eun monumàn a la mémouéye de l'abbé Cerlogne, eun buste eun bronze dou poète plachà i pià dou boouque, pa llouèn de l'eilléize.

Pe la Val d'Ousta l'abbé Cerlogne reprézente la premiéye eumportanta personalitéi de totta eunna jénérachón d'oteur que l'a fa de sa lenva dou queur eun seumbole littéréro é arteusteucco. « Mè pi grantet, dze prèdzo adret la lenga de ma mère », icrì Cerlogne deun eunna de se poézie euntitulée La lenga de ma mère, ioou sélèbre sa lenva maternella, que recougnì comme la sourse d'eunspirachón nesesséra é eundeuspensabla pe totta son euvra poéteucca é littéréra. La poézie de Cerlogne évolue deun son cadro naturel, léi ioou lo poète l'a viquì : se ver néison é prègnon forma di tradechón dou territouéro é di couleur de sa terra d'orijine, de son esprì é de si léi de se compatriote. Pe semplifiéi, la muze de Cerlogne l'eu sa chère Val d'Outa.
Encourajà pe lo tsanouéno E. Bérard, que l'èi decouver deun lo dzovéyo quezeréi dou séminéro l'étoffa d'eun poète, Cerlogne s'è dedià a sa pachón sensa jamé se considéréi eun leunguiste, ni eun dialectologue, méimo se l'é issà lo premiéi a icrie lo fameu « Dictionnaire du patois valdôtain » (1907) é « La petite grammaire du dialecte valdôtain » (1893). Se retchegnaa seumplamente eun «amoureu dou patoué ».
Deun lo mondo littéréro é arteusteucco, lo personadzo de Cerlogne l'eu euncó vouéi lo dzor eunna eumportanta référanse é eun bió mouéi d'inisiative son fran dédiée a si personadzo : la pi fameuza l'eu lo « Concours Cerlogne », concour scolére iérù istoreucco é destinà a diffujéi la sivilizachón valdoténa é lo patoué.
L'abbé Cerlogne reusteré todzor « l'un des plus aimables rayons de la poésie de nos Alpes », comme dijé de llu lo tsanouéno Vescoz, deun son éloje ou péye de la littératura valdoténa.

Teste : Proze

Teste : Poéziya

Marenda a Tsesalet

Poéziya résitaye

La bataille di vaste a Vertosan

Poéziya resitaye