(patoué Vagrezentse)
Pe l'an scolère 2023/2024 l'argumàn cherdù l'é Qui vole, tsante é moouse eun plumadzo colorà ? Le-z-ujéi, l'ommo é lo téritouéro.
Lo concour l'é rezervà i-z-eunségnàn é i-z-ecoilléi di-z-ecoulle maternelle é élémantére ; i professeur é i-z-ecoilléi di-z-ecoulle secondére de preméi é de secón grado. La partesipachón i Concour l'é gratouìa é demande la prézentachón, a l'Assessorà, di rezultà di travaille de retsertse fat, eun patoué, su lo sujé établì.
Èidjo leungueusteucco
Lo Guetset leungueusteucco de l'Assessorà fornì eun èidjo leungueusteucco i-z-eunségnàn que féyon demanda pe revére le teste eun patoué di travaille de retsertse que sarèn prézentà.
Parcour d'animachón eun francoprovensal
Eun pi, l'Assessorà propoouze eun parcour d'animachón eun francoprovensal avouì l'euntenchón de permettre i-z-élève que cougnison pa é que prèidjon pa lo patoué, de decouvrì la lenva.
Si parcour prévèi l'euntervenchón eun cllasse d'esper leungueusteucco, aprestà pe so, que prodouirèn le contenù de seutte rancontre d'animachón su lo sujé di concour.
Féisa finala
La féisa finala de la 62èima édichón di Concours Cerlogne saré a Corméyaou, lo mèi de méi 2024.