Grat de Ronc, « Un photographe à révéler ».

Quemeun-a: Euntroù
Catégorì: Otre bague

Lo mèi d’ou prochèn sarè iverta eungn Euntroù, dedeun la sola di conféranse de Mèizòn de Breuille, l’espozichòn « Un photographe à révéler » dédiéye a Grat Eloi Ronc, cougnù de tcheutte comme « Grat de Ronc, lo fotografe d’Euntroù ».
Élètrisièn (l’è llu que l’a pourtó la lemî dedeun le premî mèizòn d’Euntroù), orolojì, tourneur mi seurtoù fotografe, Grat de Ronc no-z-à quetó coutcheun permì le pi dzèn clichè d’Euntroù é de la Valoda d’Ouha di comènsemèn di siècle pasó. Oteur di sélèbre fotografiye que documènton le traille i tsahì é la costruchòn di pon nou d’Euntroù, Grat de Ronc l’è ihó avàn to lo fotografe di dzi. Le dzi de nouho veladzo, que Grat l’a reprèi – se poureu caze dî « acompagnà » – dedeun totte le-z-étape de la viya: la nésanse, l’ecoula, le couscrì, lo servicho militéo, le mariadzo, le traille de tcheu le dzor, le fihe, la vièillesse, é la mor. La mor, documèntéye avouì eun réalizme caze jèinàn mi que, repourtó dedeun son conteste, no-ze témouagne totta la fouse, la pitié é l’euntégritó de hi peuple acouhemó a suporté le proue de la viya é de la mor avouì la mima dignitó. Devàn le « portouè » de Grat fou prènde lo tèn de s’aplanté, é d’aitché le détaille; aitsedde le dro, le hocque, le bijoù, le man, le botse, le joué, le regar, le jeste, lo fon eun secòn plan, prèi caze pe cas: é tchica pe cou hi mondo prèn viya, se colore, é le dzi vo-z-aétson, i poueun que vo-ze sèmble caze de saì hèn que pènson. Vo-ze apesisedde adòn de la valeur di traille de hi ommo, que l’a saì condzeblé la présijòn de l’orolojì avouì lo talèn de l’artiste. Sarè la définichòn surprenanta di lastre, sarè lo jénì di fotografe, mi se clichè le pi dzèn l’an eun pouvouer magnéteucco, que vo-ze teurie dedeun é vo-ze léche eun souvenir eun relief, comme se vo fucho ihó lé, hènt an fa, dérì l’objétif, a fijé hise portouè sènsa tèn.

L’espozichòn s’eunserì dedeun lo programme di sélébrachòn réjonalle pe lo 150mo aniverséo de la nessanse di sélèbre Euntrolèn. L’aniverséo sarè étò l’ocajòn pe la publicachòn de l’ « opera omnia » de Grat de Ronc: hi livro (lo premî eun Valoda dedià a eun fotografe) l’a l’ambichòn de recouillì dedeun eun volume solè la biografiya, le documàn é le clichè de l’artiste. Dedeun l’espouer de rèndre pi reutse é completta pousibla la publicachòn, no eunvitèn tcheu le poséseur de fotografiye orijinelle, de clichè, de documàn é de n’eumpourte queun témouagnadzo relatif a nouho fotografe, a no-ze lo signalé. Déhèn, é avouì la permichòn di propriétéo, l’Aministrachòn réjonalla conte catalogué é publié dedeun lo livro lo matériel recoueillà. Le-z-orijinel sarèn rèndù i propriétéo i pi vito, acompagnà d’an copiya numérizéye di matériel utilizó pe la publicachòn.

Annexe