Lo projé

Pe seutta rèizón, l'è nèissì lo course « Formachón eunterréjonala Val d'Outa - Piémón », financhà pe la lloué 482/99 pe la sovegarda é la promochón di lenve minoritére é istoreuque, que l'è dedià a salle dzi que traaillón deun le buró é que fa que eumpléyaon lo patoué a l'icriet é a l'oral avouì la dzi di llouà.

Si course l'è itoù pensoù pe eugn uzadzo prateucco é pe itre eumpléyà fasilamente.

La séchón « Formachón eunterréjonala Val d'Outa - Piémón » l'è divijaye eun 5 partiye : I traaille, Prèdjì eun pebleuque, I téléfonne, Documàn, péyemèn é reprimende, Deun le llouà pebleuque.

Deun tsaque tsapitre pouchade trouì le vidéo di lesón. Eun pou liye sen que l'eunségnàn di, grase i soutitre que son itoù icriette deun la variante de patoué que lo protagoniste eumplèye. Eun pou étó chedre de avèitchì la lesón avouì le soutritre eun italièn ou bièn eun fransé. I fon de seutta partiya, no accapèn le-z-annesse iaou le contenù di lesón son icriette é tradouì eun lenva italienna é franséze.

Deun la séchon «Détsardza» trouade pi de-z-annesse lessical que consernon surtoù lo lessique pi spésefeucco comme le-z-euntsardzo deun le buró, le termo lliattoù i transpoo, le-z-abbréviachón... é de-z-annesse grammaticalque son llattoù i lesón prézentaye.

Seutte seun tsapitre prézenton eun parcour seuntéteucco mi réalesteucco di situachón pi frécante deun le rappoo de traaille : seu no accapèn le-z-espréchón pi utille é eun conseille le djeusto comportemèn que fa avèi avouì le dzi.
Le lesón de llouèn son prézentaye pe de collaborateue espèe que l'è bièn de-z-àn que tegnon le course de lenva francoprovensala valdoténa - deun lo cadro di-z-inisiative de promochón de la lenva minoritéra de l'Icoula Populéra de Patoué, réalizaye pe l'Asséssorà de l'éducachón é de la queulteua de la Réjón otonomma Val d'Ousta - é de lenva francoprovensala piémontèiza, deun lo cadro di projé financhà pe la Prézidanse di Conseille - lloué 482/99 réalizoù pe le difiente aministrachón pebleuque di Piémón.

Le variante francoprovensale eumpléyaye di-z-espèe son :

  • pe la Rejón otonomma Val d'Ousta : Antey-Saint-André, Aosta, Aymavilles, Charvensod;
  • pe la Rejón Piémón : Mezzenile, Valli di Lanzo.