Prodouì

Le prodouì

L'ie nésesséa chèdre lo suppor adatto i difièn éyadzo di mèinoù, destinatéo de heutte conte. Pe le drè dèisù s'è pensó a eun livro-queseun, soupplo é coloró, que propouze la contin-a Trotta trotta.
Pe hisse tchica pi grou (hisse que pouon tchan-ì lo livro eun man, se po finque lo llire) s'è pensó a d'otre contin-e, publiéte deun eun formà pitchoù é cartoun-ó : I tsât, Devàn la pourta, Pe lo bouque, Pe lo prou ver é Si le gnoule. Tsaque livrè contchàn tri diféente conte su lo mimo sujé. Pe le mèinoù que vèyon po l'è reustó pensó eun livrè avouì le-z-illustrachón eun relief é écrì eun braille.
Vu que l'è dzen llire le conte de eungn amì, mi dzoyé avouì llu l'è euncò mioù, an pitchouda verchón eun bouque di Tatà l'è reustéte betéte eun produchón.
Tcheu le prodouì éditorial contchagnon la traduchón di contin-e eun fransè é eungn italièn.

La deustrebuchón

A selón di difièn éyadzo di mèinoù, son reustéte penséte de modalitó pe deustrebué le prodouì di Projè Popón.
Lo livro-queseun sarà deustrebuà a la maternitó Beauregard de Veulla a totte le fenne que l'an acoutchà. A l'entroda di repar, eun bri eun bouque contchagnérè le livro-queseun é sarè beuttó deun an streutteua que conte lo projè, eun féyèn cougnihe se finalitó é se faze.
Lo premii livrè cartoun-ó de la sériye dédiéte i biche, stampó eun 8000 copiye, sarè deustrebuà gratisse a tcheu le mèinoù da 0 a 6-z-àn a traver le-z-écoule maternelle, le bibliotèque, le santre de consultachón, le-z-étude di pédiatre, le crèche, la gardérì, l'espase djouà é le-z-assistante di mèinoù. Deun tsacun-a de heutte streutteue sarè plachà eun bri eun cartón é eun bouque que contchagnérè le livrè é splequérè lo projè (son reustó réalizó 500 ézempléo).
Lo Tatà de bouque, réalizó pe la Trudi (sochétó sta fameuza pe la reproduchón de biche-djouà destin-éte i mèinoù, que l'a eunséri-lo deun sa leugne Sevia), sarè deustrebuà a tcheu le mèinoù euntrì le 3 é le 6-z-àn, eungn eumpléyèn lo mimo mouayèn de deustrebuchón eumpléyà pe le livrè.
An séchón di site eunternet www.patoisvda.org l'è reustéte destin-éte i Projè Popón. Hé eun pourè acouté totte le contin-e deun le difiente variante de patouè. Sarè euncò poussiblo lèi assédé a traver eun téléfoneun de dirii jénérachón bon de llire le QRcode.

Le ten pe la deustrebuchón

La deustrebuchón di prodouì di Projè Popón comenche lo mimo dzor de la prézentachón di projè. Donque, deun le prochèn dzor, lo livro-queseun sarè dispouniblo i Beauregard é lo premì livrè sarè dispouniblo pe le mèinoù deun le prochen-e senaa.
Lo secón livrè sarè deustrebuà a noambre, lo trijimo a janvì 2012, lo catrimo a marse é lo sinquimo a mi. A jeun di 2012 vignérè deustrebuà lo Tatà eun bouque.