Pimpa

Eunna dzournoù spésiala

Deun l'achón de promochón  é de souteun di patoué, pe tcheu le-z-èyadzo é pe tcheu le momàn de la via, l'Asséssorà de l'éducachón é de la queulteua l'a réalizoù la verchón francoprovansala d'eun DVD pe le mèinoù que l'an de 0 a 6 an.

Si DVD prézente catro épizode animoù iaou la protagonista l'è la fameuza Pimpa, pensaye pe Francesco Tullio-Altan, l'an 1975. Le titre di-z-épizode son : « La gatta addormentata - La Tsatta eundroumiya » ; « Gara di lentezza - Coursa de qui areuvve dérì » ; « In fondo al mare - I foun de la mèe » ; « Pattinata su Saturno - Colatoù desù Saturne ».

Le teste orijinal son itoù tradouì, deun le patoué d'Arnà, de Brutsón, de Cogne, de Dzegnoù, de Sen Cretoublo é de Sèn-Marsì, pe lo Guetset leungueusteucco de l'Asséssorà. Seutte teste son itoù dobloù pe chouì atteur de caquin-e di compagnì que féyon partia de la Fédérachon Valdoténa di Téatro Populéro : Marco Boch (Le Badeun de Chouéléy), Luciana Casassa (Le Djabloteun), Andrea Cavagnet (Lou Tracachemèn), Claude Lévêque (Le Falabrac), Elisa Pieillier (Tan Pe Ri-Ye) éNella Joly (ansièn atteue de La compagni dou Beufet).

Lo coordonnemàn di projé l'è itoù baillà a Yvette Buillet. Le trèi tsansón di DVD son itaye tradouite é tsantaye pe le 14 mèinoù di queur Les enfants du Grand-Paradis, dézò la dirèichón de Luca Casella, Lara Luboz é Christel Rollet. Pimpa l'è can mimo acoutoumaye i lenve minoritére vu que l'a dza apprèi lo cimbro, lo frioulàn lo ladeun, lo mocheno, lo sappadino, lo sarde, lo saurano é lo timavese.