(patoué dé Bretsón)
Le pianette qu'i comandon tsou segn son Jupiter é Neptune, l'élémèn l'é l'éva.
O Soroi pasa nou signe tra o 20 dé févrì é o 19 dé marts.
Coulour : o violet.
Pira da chanse : l'évamarina.
Métal : l'ehtàgn.
Djor chansà : o dedjos.
Caratére
O sémbole dé tsou segn l'é feut dé douch péchón qu'i najon nou sans contrére é tso vou dire qué le djen Péchón son pa bon dé prénde eunna dirètsión un co pé totte. L'an soèn a téhta ni nébie é sondjon to y ouèi ivert.
Son sénsébio, compréndon y atre é i créon qué nou mondo séon touì bravo. Pé tsétta rajón, corra cahcùn ié fèi dé ma, sé la préndon é son moué pénabio.
I l'an bona mémouére é i son bon dé récordé-se le mimbre tchoze, belle s'i l'an capità d'an é d'an dévàn.
Soèn, l'an o visse dé fér-se dé ma da solet. En pieuch, i son timidde é l'é malén d'aroé a ié cogniche ou fonts (finque iour sé cognichon pa fran bén !). O caratére di Péchón l'é pién dé contraditsión. I son bon dé tchandjé d'idé d'un momèn a l'atro, ma i l'an contùn voya dé aidé y atre, belle sé dé co son plandrón é lammon a véa léna. Lammon le vouéyadjo, ma corra sé boudjon tchertchon dé pa dechpensé tro d'énérjì.
Én amour, son romantécco, i compréndon o iour compagnón, ma i son quiécca djalous. Corra i l'an dé minà, son afettous é i son pa bon dé réprodjé-ie ren. I lammon a fameuya é a véa di mite.
Vents o travai, i son créatif, ma l'é mièi s'i travayon én sosiété vo cahcùn, perquè i son fran portà pé travayé énsémbio a y atre é a colaboré. Son pa tan bon a fére économéa é dé co i campon vià le sot.
Dou pouén dé vu da salutte, o iour fébio son surtoù le pi.