Perquè non prèdja patoué én Val d'Ohta ?

(patoué dé Bretsón)

Né y Alpe, a latinizatsión di Gaules l'a pasà a légna dé partadjo dé y éve qu'a diviza o bassìn dou Rhône dé tsou dou Po é di chè affluèn, dé manira qué le léngue prèdjà ni montagne dou territouére qu'ou sé troa éntrémì dou col dé Tenda é o Mon Roza (a Roja) sé atacon pa a latinizatsión qué l'a feu nache o piémontés, ma a tsella qu'a l'a donà a lénga d'oc é o francoprovensal[1]. O versamèn di prèdjè galloromàn so a cohta orientala dé y Alpe l'a créà un continuum dou pouén dé vu jéolénguestécco, én béttèn énsémbio le populatsión dé tsé é dé la dé eunna tchéna dé montagne belle parì grousa.

A rajón dé tsou fénomène a l'arua da périodda doucque tsé léngue l'an forma-se é, to pieu dè prétchizión, a l'an 575, corra Gontran, réi mérovindjèn dé Bourgogne é da réjón dé Orléans, apré qu'ou l'ae tchatsà le Lombar da Provence, y ira én trén d'aprechté eunna gnoa echpéditsión militére. Le Lombar donca l'an préférà bétté-se d'accort é l'an récognù l'otorité di Franc so a Val d'Ohta é so a Val dé Suza, to le iour col parì émportant, é co so le ate val dou Po é di chè affluèn, tanque o col dé Tenda. A modé dé tsétta data, a Val d'Ohta a l'a partadjà o dechtìn di Gaules é Pont-Saint-Martin l'a vénì a fin qu'a divizae le prèdjé da Gaule dé tsi dé l'Italie dou Nord, a grousa limitte éntrémì dou fransé è dou tayàn.

A féodalité l'a renfortsà l'ézichténtsa dé tsétta comunité qué, ou djor dé ouèi, non poret créyé transfrontaliéra é le Savouè, da iour part, l'an beuttà le baze pé eun Echtat so douch versant. Tsétta situatsión l'a derà tanque o 1860-1861, to l'annessión da Savouè a Franse é l'Unité d'Italie : dé tsou momèn  o baradjo dé y Alpes otchidentale l'a vénì frontira d'Echat.



[1] Cf. Tuaillon, Gaston, Le francoprovençal dans le bassin du Pô, « Nouvelles du Centre d'Études Francoprovençales René Willien » 48, 2003, pp. 6-17.