Orijine, istouére é particularitoù

(patoué dé Bretsón)

O francoproventsal pout ése considèrà un protofransé, qu'ou vou dire un fransé én eunna faze primitiva, moué viéya, qué l'a réfuzà le novétà qu'i l'an aroà dou Nord. Én effet, o francoproventsal l'a choù dampremì o tchumìn di prèdjé dou Nord, dé Parich per éjémpio, ma, a modé d'un sertèn momèn, l'a pamà asettà le novétà da lénga d'oïl. Dé tchoze qu'i l'an capétà ou lon dé l'ichtouére l'an aidà a formatsión dé tsétta lénga : o doméne francoproventsal outor da légna Lyon-Genève é dezeut l'énfluéntsa dou santre pi émportàn, Lyon, l'a comintsà a vichque eunna période doucque l'a ichtà marèmàn bettà dacohte.

A séparatsión tra lénga d'oïl é francoproventsal l'aret donca éncomintsà a fin dé l'épocca mérovindjenna ou a l'énvión dé tsella carolindjenna : a modé dé tsou momèn la, o francoproventsal l'a rehtà conservatour é, o contrére, o fransé l'a continuà eunna évolutsión moué forta, belle pé le gro tchandjemèn dé populatsión qu'i l'an capétà na Gaule dou Nord. L'orijinne é o dechtìn dou francoproventsal son guiettà dé manira ehtretta a sort da cha capitala ichtorécca, Lyon, capitala di Gaules é santro qu'ou diffuzae lé novétà da lénga.

O francoproventsal, én pieuch, ou l'a pa le caratére qu'i l'an permettà a d'atre prèdjé dé aé eunna éndividoualité pieu marcà : én effet, l'a jamé u eunna unión polétécca, l'a jamé cognù un momèn dé unificatsión, l'a jamé u eunna koinè, qu'ou vou dire eunna lénga quemeunna damón le variété locale. Én pieuch,  vers a fin dou Mouayèn Adjo, can Lyon l'a perdù o cho role polétécco é l'a permettà i réjón dé évoluése én liberté, a divizión lénguestécca dé tsi prèdjé l'a vénì co pi forta. O francoproventsal l'é donca eunna lénga qu'a sé prézénta én eunna cantétà dé prédjé, qu'a sé troa a l'ehctat dou patoué pur, qu'a l'èzichta pacque vents a variété di chè prèdjé.