Distribuchón si lo térritouéro

(patoué dé Bretsón)

O doméne francoproventsal régarda, ou djor dé ouèi, tré Echtat é l'a donca moué dé diféréntse dou pouén dé vu polétécco é l'a pa le caratére dé eunna natsión : non ié pou doné dé fin a titre dé définitsión.

Tutùn, tratsé le limitte jéografécque dé tsétta zona l'é pa na tchoza simpia ; soèn i son pa bén marcà é poon tchandjé ; malgré tsen, l'analiza di caratére quemeun dé tsétta fameuya lénguestécca l'at aroà a eunna délimitatsión dé trou janre :

 

 

  • a Val d'Ohta, mins le tré quemeune qu'i l'an un patoué allémàn da Val dou Lys, Gressoney-la-Trinité, Gressoney-Saint-Jean é Issime ;
  • a Chuisse romanda, mins o Jura bernèis é, pieu prétchizamèn, le cantón de Neuchâtel, Vaud, Genève, Fribourg é Valais ;
  • a Savouè é l'Ata Savouè, o Lionés, o Dauphiné dou Nord (Grenoble é Vienne), eunna parquià da Franche-Comté, o Bugey é a mità méridionala da Bresse ;
  • le val dou Piémón dé l'ouest dezeut Turùn : a Val Sangone, a Val dé Suza (mouayenna é basa val), a Val Cenischia, a Val dé Viù, a Val dé Ala, a Val Grande, a Val Locana é a Val Soana ;
  • le doe colonie allofone dé Foggia én Puglia, Faeto é Celle di San Vito,  qu'i l'an trama-se la vers a fin dou XIII° siécle é l'envión dou XIV° é qu'i l'aruéròn, sélòn l'analiza di caratére lenguestécco,dé l'est dé Lyon, én Bugey.