(patouè dé Antey-Saint-André)
Réalizoye dé l'Assessorà dé l'éducachón é dé la queulteua dé la Réjón otonomma Valé d'Euta, prézèn dedeun lo programme dé la « Saison culturelle », Tourna avouì mè, la premée comédì muzicala én patouè, y a avù én gran sussè a l'occajón di reprézentachón féte ou téatro Giacosa dé Veulla, lo 25 é lo 26 févré pasó.
Seutta euvra dou dramaturje Benedetto Sicca, betoye én mezécca dé Christian Thoma, avoué la coréografì dé Marco Chenevier é la mize én chéna dé Alessandra Celesia y a itó énterprétoye dé 26 atteur, énsembio a la corala dé Vogrezentse é avoué la partisipachón estraordenée dé Maura Susanna é dé Ranzie Mensah.
Lo spettacle y éve bièn atendù é eunna tréjéma reprézentachón y a itó djontoye i dovve prévouè, pé répondre a la démanda dou pebléc.
Lé 1400 personne qu'y an assistó i tré reprézentachón y an bièn batù lé man i-z-atteur é i coriste qu'i che son betó én djouà dedeun én janre jamé espérimentó pé lo téatro populéo én patouè.
L'assesseur Laurent Viérin y a déclaró étre satefé dou sussè dou spettacle é dé l'éntéè moutró di dzen pé seutta espérianse novéla, la comédì muzicala én patouè. Pé l'Assesseur y é la prouvva qué lo patouè, lenva dou queur di Valdotèn, y é én tren dé vinì eunna lenva d'éntégrachón pé lé diféèn élémèn qu'i compeuzon neutra quemenetó. Én travaillèn avoué dé mouebbio moderne n'en moutró qué lo patouè i ch'adatte a totte lé-z-esprèchón dé la littéateua, dou téatro, dé la mezécca é dé l'ar. L'Assessorà i contén a travaillé pé propozà dé bague novéle qu'i posissan moutrà la vitalitó dou patouè é éncoadzé lé dzen a ch'éntéèsé a seutta lenva.
Seutta inisiativa i ché djonte a totte selle qué l'Assessorà propeuze sisse déré an pé la promochón dou patouè pé mantinì viventa seutta lenva é la trasmettre i novéle jénérachón.
Pé frounì, l'Assesseur y a éncò déclaró qué si janre d'évènemèn i bayon la possibilitó ou patouè dé ché mantinì vivàn é i déràn pousà lé dzeveunno a l'émplèyé. Y é émportàn dé ché rapélà dé ioù qué no vegnèn sensa pédre dé ieuvva lo mondo outor dé no. N'en paé la possebeletó dé rendre lo patouè attuel é dé nen fae eunna lenva dé communicachón moderna. Rémersièn totte lé personne qu'y an portó én dévàn lo projè é qu'y an collaboró én rendèn pousibbia seutta euvra, le-z-atteur, la FVTP, lé metteur én chéna é tcheu sisse qu'y an collaboró dé magnée diféente a seutta inisiativa
